Schangnou vor 600 Jahr sövu wärt gsy

Schangnou vor 600 Jahr sövu wärt gsy
120 settegi Münze isch dr Prys gsy für ds Schangnou. / Bild: zvg

Am 1. März im Jahr 1420 isch d Herrschaft Schangnou a die Gnädige Herre vo Bärn verchouft worde: D Henrietta, d Witwe vom Cueni zum Waud, u ihri beide Sühn, Dietrich u -Göryo zum Waud, hei denn dr Vertrag la verurkunde. Ds ganze Schangnou hei die gnädige Herre für 120 rheinischi Goude kouft. So ne rheinische Goude isch 3,469 Gramm reins Goud schwär gsy. Das heisst auso, das ganze Gebiet denn isch 416,28 Gramm Goud wärt gsy – oder ihr hütige Währig öppe 23’500 Franke.

Wo de Schangnou definitiv zu Bärn isch cho, het me das Hochwaudläche ufteilt u de Schangnouer Bure wöue verpachte. Am 13. Juni 1511 het dr Rat vo Bärn de Lüt im Schangnou die Verpachtig gnähmiget. Drfür hei d Schangnouer au Jahr müesse Chäs, Haber u Hüehner uf Bärn liefere.

Scho 15 Jahr speter, auso 1526, het Bärn die Gränze müesse bereinige, wüu «allenthalben in unnseren lannden unnser Hochwalld verwüstlichen und verderblichen gewchwenndt worden». D Obrigkeit z Bärn het gmerkt, dass die Schangnouer eifach Houz usem Hochwaud näh; u zwar nid weni: Si hei ganzi Teile eifach grodet. 1531 het me de d Aup Honegg usparzelliert, wüu gar ke Waud me isch dert gsy u Lüt vo Worb hei die Aup gkouft.

1581 het dr Staat Bärn d Abgabe massiv uechtetaa, wüu es paar Bure scho wieder hei Waud grodet, ohni z frage, u dür das dr Staat Bärn gschädiget hei. No im Jahr 1686 heige wieder es paar Schangnouer die Gnädige Herre «hinderlistigersweis» gschädiget.

I de Jahr 1821 u 1822 isch z letscht Mau das Verzeichnis nöi aagleit worde. A Hand vo däm Verzeichnis hei mir itze o -chönne usefinge, wo genau die Gränze denn sy düregange.

U e Charte vo Schangnou im Massstab 1:25’000 isch zersch Mau 1891 usegää worde vor Landestopografie. Weme die Charte mit dere vo hüt verglicht, gseht me scho dr eint u anger Ungerschied – aber es isch -natürlech nid eso uffäuig, wie weme öppe e Agglomerationsgmeind wie Ostermundige -aaluegt. Unger angerem hei im Schangnou Hofnäme gänderet u es het um 1900 no es paar Höf meh gää weder hüt. Im Buech über Schangnou wei mir natürlech o probiere, aui die aute Näme z erforsche u zäme z -sueche. Dr hütig «Grüenewaud» het aube «Magun» gheisse, oder ds «Ungerhuus» im Wald no «Schineflue».

20.08.2020 :: Hans Minder