«Stächel»-Orte gits fasch nume hie

Bim Wort «Stächel» däiche die meischte im erschte Momänt ane Stachu – öppe a eine vomene Wäschpi oder vonere Dischtle – Aua! Drby isch ganz öppis angers gmeint mit däm Wort: «stächel» stammt nämlech vom authochdütsche Adjektiv «stëchal» ab u das meint so viu wie «steil». Hüt fingt me ds Wort «stächel» nume no i Ortsnäme, süsch isch es scho lang nümme im Gebruch. U ds Äntlibuech u ds Ämmitau sy quasi d Bewahrer vo däm mittuauterleche Wort – nume no im Bärner Oberland hani zwe Orte gfunge mit däm Wort: «Stächubärg» bi Mürre u z Grinduwaud gits e chly nördlech vo de Männliche e «Stächelgrabe».

Hieumenang fingt me hingäge de grad es paar Byspiu. D «Stächelegg» dörfti viune Wanderer e Begriff sy. Weme vom Napf gägem Änzi übere geit, chunnt me a däm Ort verby. Dert passt die Bezeichnig o beschtens häre: Uf Luzärner Syte geits praktisch sänkrächt überne Flueh ache u uf Bärner Syte dür nes cheibe stotzigs Bord. Dert ungerdranne isch nächär ds «Stächeleggloch»; dert faat när dr Fankisbach a. 

Dr Ort «Stächelegg» isch i historische Dokumänt guet beschribe: «Uff den höchsten knubell ... die Stächell egg genannt», steit unger angerem im Trueber Urbar usem Jahr 1531. 

Das isch aber nid die einzigi «Stächelegg» im Gebiet vor Wuche-Zytig. E wyteri fingt me bi dr Südelhöchi, churz vor Sörebärg. Vo dr Waudämme us geit dert e steile Grat gäge Süüde ueche, wo äbe eso heisst. 

U de fingt me im Marbach, es stückwyt hingerem Campingplatz, no e dritti «Stächelegg». Das Heimet ligt ufeme markante Gländerügge. 1682 isch im Verzeichnis vo de Gülte «Hans Thallmans Stächelegg» erwähnt. E chly nördlech treit no es zwöits Heimet äbefaus die Bezeichnig. I historische Queue isch vor «hinder Stächelegg»
d Red. U de gits dert no ds «Stächeleggmoos», wo im glyche Verzeichnis aus «sthechell mooss» notiert isch worde. 

Weme bi däm Wort dr mittler Teu «egg» usenimmt, de het me «Stächelmoos» u dä Ort fingt me ganz hinger im Hilferetau.O dert passt d Bezeichnig sehr guet: Unger isch ds äbenere Land, wo zimli moosig isch, u när geits ueche gägem Scheidgrätli u obe dranne isch d Schratteflueh mit dr Hächle – u die isch ja äbe steil oder äbe «stächel».


Queue: «Ortsnamenbuch des Kantons Bern», «Orts- und Flurnamen des Amtes Entlebuch», idiotikon.ch u wyteri. Aafrage: 034 409 40 05 oder zuercher@wochen-zeitung.ch

16.07.2020 :: Bruno Zürcher (zue)