Dr Wyler Rindisbach isch zersch Mau 1250 erwähnt worde. / Bild: egs
Es isch ja nid grad erstunlech, dass me im Ämmitau u Äntli-
buech grad es paar Ortsnäme mitem Wort «Rind» fingt. Es grase ja nid grad weni Rinder uf de Weide hieumenang – o weme dene vor auem im Ämmitau ender Guschti seit. Das Wort isch aber e schwyzerdütschi Erfindig, u vo däm här viu jünger aus ds Wort «Rind», wos scho im Authochdütsche aus «(h)rind» het gä – u eigentlech ds Glyche het bedütet wie hüt.
Spezieu a de Ortsnäme mit «Rind» vo dere Gägend isch, dass ömu zwe sehr autbeleit sy: Dr Wyler «Rindisbach» – es git o d Schrybwys «Rindsbach» – ir Gmein Signou. Dr zwöit isch «Rinderbach», wo z Affoutere aafaat, ar Gränze vo Rüegsou u Heimiswiu nalouft u när i
Rüegsbach u no speter i d Ämme geit. Bi däm Ort isch es eso, dass imene Dokumänt usem Jahr 1389 e «Burgkart Schello von Rindersbach» erwähnt isch.
Sogar no früecher, nämlech um ds Jahr 1250, isch die erschti
Erwähnig vo «Rinderbach» ir Gmein Signou.
Eher spezieu sy die zwo früeche Bezeichnige, wüu denn d Viehwirtschaft no viu weniger ver-
breitet isch gsy. Ersch eso abem
16. Jahrhundert isch hieumenang vo dr Mischwirtschaft mit Acherbou u Chlytier uf d Hautig vo Grossvieh mit Chäsproduktion umgsteut worde.
Grad wüu äbe i dene zwöi Gebiet Rinder sy ghaute worde, sy die Ortsnäme überhoupt entstange. Entstange sy usem Ortsname «Rindisbach», Gmein Signou, de o d Familienäme «Rindisbacher» u «Rindlisbacher». Die hei Heimatort Louperswiu, aber o Landiswiu, Lützuflüeh u Wauk-
ringe. Dir wärdet nech itz frage, warum hei die nid Signou aus Heimatort? D Antwort fingt me eigentlech im Urbar vom Schloss Trachsuwaud, wo dert no dr Zähnt het chönne ynäh: «Der zenden ze Rinderspach wass Im Kilchspel Loubersswil ist» – das Gebiet het auso e Zyt lang zu Louperswil ghört.
Ortsnäme mitem Wort «Rind» fingt me o no angeri: «Rindergrat» heisst dr offizieu Name
vomene Heimet, wo me «Ringe-
grot» seit. Das Heimet isch ufere Ahöchi bim Hornbach ir Gmein Sumiswaud. Südlech vo Schüpfheim, grad ar Waudämme gits ds Heimet «Rinderhus» u «Rinderweid» heisst es Heimt chly
nördlech vo Affoutere.