I bi wieder einisch i aute Zytige ga luege, ob i öppis finge zum Thema «Schangnou». Am 4. Ougschte 1831 isch es fürchterlichs Gwitter über Marbach u Schangnou zoge. Me brichtet, dass im Schärlig e Frou am Spinnrad vom Blitz syg erschlage worde. Z Marbach sy o zwöi Guschti vom Blitz troffe worde u uf dr Trittschwändi im Schangnou syge imene Stau vom Rouch, wo der Blitz heig verursacht, acht Chüe erstickt. Ir Ramsereschüür isch das amene Maa ir Stube passiert u z Flüehli isch es Buebli ir Stube am Rouch erstickt. Es isch mir eis ufgfaue: Fasch aui Brichte ghöre id Kategorie «Unglücksfälle und Verbrechen». Entweder isch das Schangnou e Ort, wo ds Uglück aazieht oder de hei d Zytige nume über Schangnou gschribe, we öppis Schlimms passiert isch. Weit dir no es Byspiu: Am 25. Juli 1852 isch vom Blitz d Auphütte uf dr ungere Fluehalp aazüntet worde. D Familie vom Samuel Wöufli het aus verlore. Guet, es git o da Usnahme. Im Oktober 1857 isch z Bärn e grossi Landwirtschafts-Usstellig gsy u me het es Schwingfescht gha. Dert het zwar e Wenger usem Röthebach dr erscht Prys gwunne, aber e Hadorn vom Schangnou isch doch föift worde. Im 1856 isch vorem Gricht z Thun der Chrischte Wöufli erschine, wüu är dr Dokter Schüpbach z Chise heig usgroubt. Me heig aber ds Meischte vom Gstounige wieder gfunge, aber me het dä Manno für zwöi Jahr i ds Schalewärch verurteilt. Die Gfangene dert sy mit Chöttine zämebunge worde u hei müesse ga Strasse fäge. No öppis Inträssants hani im «Intelligänzblatt von Bärn» gläse. Im Mei 1856 sy d Honorazione vom Äntlibuech mit de Schangnouer z Schüpfheim zämeghocket. Ds Thema: E müglechi Strass übere Schalle-bärg Richtig Thun. Es hät se düecht, das wär doch e Müglichkeit, schnäuer mitem Veh vom Äntlibuech is Bärner Oberland z cho. Me het bschlosse, so es Projekt uszschaffe u das de de Regierige vo Luzärn u Bärn vorzlege.
1857 isch dr Pfarrer Meyer vo Schangou abglöst worde, wüu är mit verschiedene Schangnouer vor Gricht isch gsy. Är isch de o versetzt worde, wüu d Chirchleitig z Bärn dr Aasicht isch gsy, dass da zviu Gschiirr verschlage syg. Me het das de i de Zytige publiziert, «um allfälligen falschen Muthungen vorzubeugen».
Es git o i de nöiere Zytige öppis z finge. So schrybt d NZZ us Züri am 22. Juli 1947 über e Bsuech vom Vizeadmiral Henry Bieri, Chef vo der amerikanische Flotte im Mittumeer, z Schangnou. Är het sogar no e Cousin gha, wo ir Schwyz het gwohnt u Hotelier uf dr Axaup by Brienz isch gsy. Die heige sech de im Schangnou, näbscht em Veh u de Höf, vor auem drfür intressiert, vo wo dass ihrer Vorfahre sy gsy.