Im Burechrieg vo 1653 sy d Schangnour nume e chly aktiv gsy; nume es paar wenegi hei würklech z vorderscht mitgmacht. Überlieferet isch nume grad ei Name, u das isch Zimmermaa.
Aber wo anno 1656 dr erscht Villmergerchrieg zwüsche de reformierte u de katholische Orte usbroche isch, hei de Schangnouer o die guete Verbindige zu de Äntlibuecher nüt meh gnützt. Am 11. Jänner 1656 hei d Luzärner ds Schangnou eroberet. U nid nume das: D Luzärner hei o grad ds Pfarrhuus u d Chiuche aazündet. D Lüt säuber sy Richtig Eggiwiu uf e Schauebärg gflüchtet.
Dr Landvogt vo Trachsuwaud wär am liebschte grad sofort mit de Ämmitauer Truppe i ds Äntlibuech ymarschiert, aber Bärn het no zögeret. Me het haut z Bärn de Ämmitauer Truppe nid rächt trout, wüu die im Bure-
chrieg vor drü Jahr mit de Äntlibuecher zämegspannet hei gha. D Luzärner hei i däm Monet, wo si ds Schangnou hei gha, so richtig gwüetet: d Glogge hei sie gstole u d Kanzel verschittet.
När isch Bärn ygschritte u d Ämmitauer hei dasmau nüt gäge d Bärner gmacht – me isch uf d Luzärner los.
Am 18. Februar isch Schangnou de wieder bärnisch worde. Bir Rückeroberig syge föif Bärner Manne u eis Ching umchoo im Kampf. D Luzerner hei 50 Lüt verlore u 40 syge gfange worde, hei d Bärner brichtet. No im glyche Jahr het me mit dr Renovation vor Chiuche aagfange.
40 Pfund het dr Landvogt vo Trachsuwaud zaut, dr Chor z decke het d Stadt Bärn übernoo. Vermuetlech hei d Schangnouer o ds Chiucheschiff müesse nöi decke u bir Türe vor Chiuche het me müesse nöii u stercheri Bschleg dratue. D Kanzle het me ganz nöi müesse zimmere, wüu me die auti nüm het chönne zwägmache. Bir Rückeroberig isch de o ei Glogge vo 1617 wieder uf Schangnou choo u die nöii Kanzle isch 1657 ybout worde.
D Chiuchebüecher hei d Luzärner natürlech o verbrönnt. Drum gits vor 1670 eigentlech nüt z finge bi de Bürger vo Schangnou.
Was no spezieu isch: Ersch 1831 het me e Orgele zuecheta. Me het die Huusorgele bim Chammermaa uf der Moosegg bsteut. Speter het me de o a grossi Orgele kouft u die auti Orgele isch lang umegstange. Hüt cha me die im Chüechlihus bewundere, u mängisch o ghöre.