Kapäue u Spure vo dene Hüser

E Läser het mi gfragt, was es eigentlech mit de Ortsnäme mitem Wort Kapäue ufsech het. Uffauend isch, dass es nid grad weni settig Ortsnäme git. Weniger überraschend isch das im katholische äntlibuech. Bekannt isch öppe d Sankt-Anna-Kapäue ufem Schwändubärg, d Chlus--Stalde-Kapäue, wo am Heilige Niklaus gwidmet isch oder d Sankt-Josef-Kapäue ufem Schüpferbärg. Ganz ir Neechi vo dr Josefkapäue fingt me d Liegeschaft Chappelmatt. Genau glych heisst es Heimet bi Wigge. Dert syg bis 1958 e Kapäue gstange, wo die «hellgen dry kungen», auso die drei heilige Chünige, sy dargsteut gsy, wie imene Dokumänt usem Jahr 1523 z läse isch. Im ämmitau sy mit dr Reformation viu Kapäue kaputt gmacht worde. Dank de Ortsnäme u de Yträg i historische Dokumänt chame aber no hüt gseh, wo dass es Kapäue het gä. Imene Urbar usem 15. Jahrhundert vom Thorbärg, wo denn no es Chloster isch gsy, steit: «die capell zu^o wikerswil». I däm Dörfli bi Waukringe isch hüt nüt meh vonere Kapäue z finge. Ds Glyche giut für d Chappelematt zwüsche Sumiswaud u Trachsuwaud. Dä Ortsname chame so düte, dass das d Matte bi dr Kapäue isch. Matte u ächer sy o a angerne Orte nachere Kapäue benamset worde. Die Hüser sy natürlech öppis sehr Uffäuigs gsy u de isch o klar gsy, was gmeint isch. Byspiu fingt me i de Gmeine Oberdiessbach, Chonufinge, Grosshöchstette, Louperswiu, Langnou u Oberburg. Dert sy auso früecher eso chlyni Chiuchli gstange. Ds Wort Kapäue stammt vo «cappa» ab, wo «chlyne Mantu» bedütet. Die Bezeichnig geit ufe heilig Martin zrügg, wo gmäss der Legände si Mantu söu haubiert ha u ei Heufti amene Bättler söu gä ha. Ganz jede Ortsname mit «Chappel» het si Ursprung aber de äue glych nid bire Kapäue. Bim Wyler Hopfer ir Gmein Trachsuwaud gits es Huus, wo Chäppel heisst. Es git kener Bewyse, dass dert einisch e Käpäue isch gstange. D Bezeichnig isch ender e Churzform vo Kaspar. ähnlech dörfti dr Fau bim Chappeliloch sy. Näbedrann ligt nämlech ds Heimet Kaschishus, wo äbefaus uf dä Vorname zrügg geit. Die 500 Jahr sit dr Reformation überläbt het wyter o dr Name Sankt Oswaud zwüsche Heimisbach u Langnou. Dert sy aube o viu Piuger ungerwägs gsy.

Queue: «Ortsnamenbuch des Kantons Bern», «Orts- und Flurnamen des Amtes Entlebuch»,Idikon.ch u wyteri. Aafrage: 034 409 40 05 oder zuercher@wochen-zeitung.ch