Im Summer 1871 isch Chrieg gsy zwüsche Dütschland u Frank-rych u die erwachsene Manne sy ar Gränze gstange.
Da syg viu Arbeit ume gsy füre Gärber Hans – vo däm, woni scho im letschte «Vo Früecher» brichtet ha. Im Herbscht 1872 heig ihm si Mueter gseit, är söu uf Schangnou zum Chüjer Siegethaler ufe Scheidzuunhubu. Vorhär heig är aber no im Trueb bim Schnyder wöue Chleider la mache, schrybt dr Gärber Hans
i sire Biographie. Wo är isch abgreiset, heig ihm dr Meischter e Föifliber gää u gmeint, das syg schon e chly weni, aber er müess haut lehre z darbe. Dr Schnyder heig gfluechet u gseit, wen är nid 42 Franke bring, chönn är die Chleider i ds Chemi schrybe. So isch dr Gärber Hans truurig ids Schangnou iche gwanderet mit sim Bündeli ufem Räf, wo är no vo sim Grossätti gerbt het.
Immerhin heigene Siegenthalers fründlech begrüesst u si syge ganz erstuunt gsy, dass är nid meh Chleider heig. är heig du vo sim Erläbnis bim Schnyder im Trueb verzeut, aber dr Siegenthaler heig gmeint, är söu das nid so tragisch nää, das chömm de scho guet.
Es paar Tag speter heig ihm dr Siegethaler 50 Franke gää u gseit, är söu uf Trueb ga Chleider reiche. är heig de zum Meischter gseit, dass er gar nid söfu bruchi. Aber dä heig gmeint, är söu am Schnyder es Treichgäut gää u ufem Wäg dörf är sich wäger o es Bier oder es Glas Wy gönne. Nume dr Schnaps, dä söu är vergässe.
I däm erschte Herbst isch dr Hans mit de Senne vom Scheidzuun mit de Chüe zersch uf Frymettige u när uf Niederhünige. Nach acht Tage syge de aui wytersch nach Chärneried i ds Winterquartier. Im Winter heig me dert d Chüeh gmulche u d Miuch zu Anke u Magerchäs verarbeitet. Die ganzi Fuehr syge öppe 130 Chüe u 30 Rinder gsy. Schpeter syge de no einisch 60 Chüe vom Schangnou nach Houzmühli bi Hindubank cho. Drzu müess me no öppe 30 Geisse u 400 Schaf zeue. Das isch Veh gsy, wo im Summer uf 16 Aupe im Schangnou het graset: oberi u ungeri Gemmi, obere u ungere Scheidzuunhubu, unger u ober Bödeli, unger u ober Breitwang, unger u ober Bürkeli, hinger Windbruch, Grossegg, Wimmisaup, Stähli, Rotmoos u usser Hungerschwang. Es paar vo dene Aupe gits hüt gar nüm, wiu dr Kanton i de 1900er-Jahr het Land kouft u ufgforschtet.
D Rinder sy uf der Aup Rotmoos u Grossegg gsy, dert sy o d Schaf gsümmeret worde.