Z Schüpbach gits e Töpferei. Gnau gno, müesst me uf Bärndütsch ja Hafnerei säge. Dä Betrieb isch hüt öppis Einzigartigs – früecher hets ir Gmein Signou mehreri Hafnereie gä: I probiere die zämeztrage. Bis itze hani afe nün Betriebe gfunge, woni sicher cha säge, wo dass si sy gsy. Dr Christian Bieri-Pfäffli het im Huus a dr Houptstrass 17 sis Atelier gha. 1879 isch är gstorbe u si Witwe het das Huus am Fritz Bieri, am Glättimüller, verchouft. Dr Glättimüller isch dä gsy, wo die Mineralie het gmale, wos für die farbige überzüg vor Keramik het brucht.
Es Jahr speter het de dr Jakob Summer d Wärchstatt für si Sattlerei umfunktioniert.
O dert, wo hüt ds Restaurant Chrüz steit, isch bis i ds Jahr 1879 e Hafnerei gsy. Bis 1830 isch a dere Steu nume e Matte gsy. Dr Christian Bieri, äbefaus Glättimüller, het das Land kouft u dert es erschts Huus la boue. Dert het är e Hafnerei mitere Brönnerei gha, speter isch de o no e wyteri Glättimühli u e Chnochestampfi drzuecho. 1879 hets si Junior das aus verchouft u dr Peter Lehmann het das ganze zunere Wirtschaft umbout.
A dr Eggiwiustrass Nr. 7 isch die auti Glättimühli gsy u die het o dr Familie Bieri ghört. Die Familie isch rächt vermögend gsy, im Erbvertrag vo 1879 sy meh weder zäh Liegeschafte z verteile gsy.
O d Hafnerei a der Eggiwiu-strass 41 het dr Familie Bieri ghört. Das Huus isch ersch 1873 bout worde vom Johann Bieri. Si Witwe het de die Liegeschaft 1898 ihrem Schwiegersuhn Jakob Bärchtold übergää u dä het de dert wyter ghafneret. Si Suhn Ernst het de im Jahr 1935 dr Lade zueta. Sithär sy Kohlers die einzige z Schüpbach, wo däm autehrwürdige Gschäft no d Ehr aatüe. E wyteri Hafnerei isch am Schachewäg 5 z Schüpbach gstange. I däm Huus dörfti o bis um ds Jahr 1935 ghafneret worde sy. Das Gschäft het am Fritz Dällebach ghört.
O im Dorf Signou hets e Töpferei ghaa, nämlech im Moser-huus. Dert het d Familie Ryser bis 1927 e Hafnerei betriebe. Wyter isch offebar o a dr ungere Sunnhaude früecher e Hafnerei drin gsy. Dert hani aber no nid usegfunge, wär das dert gschaffet het.