E ämmitauer Spezialität sy die sogenannte «Frässbedli» gsy. Fasch i jedere Gmein hets settegi Bedli gha – schliesslech hets chum imene Huus es Badzimmer gha, für so öppis isch me äbe i ds Bad gange. Klar, dr Gotthäuf het o scho vom Gurnigubad gschribe, aber mit Usnahm vom Chäshändler u Grossbure sy da chum gwöhnlechi Lüt ufe Gurnigu ueche ga bade – für die hets äbe die chlyne Bedli gha. O ds Signou isch vo so Bedli brichtet worde.
Erwähnt hani scho mau, dass me im «Hof» het chönne bade. Ab 1800 isch o ganz hinger im Ronach es Bad gsy. Sicher isch, dass das Bad im 1783 no nid isch gstange: Im Huusverzeichnis vor Landvogtei Signou isch uf au Fäu nüt drvo z finge. Me cha sicher säge, das ab 1800 dert hinger e Art Schopf isch ygrichtet worde, wo me het chönne bade. 1858 het dr damalig Bsitzer, es richtigs Badhus la boue u me het i vier Zuber us Houz chönne bade. D Queue zum Bad isch hinger us em Waud usecho. 1862 het dr Herr Gohl i sim Badführer vom ämmitau ömu o ds Ronachbad erwähnt.
Nach de Ungerlage isch das Bad um 1880 ufghobe worde, ds Geböide isch aber ersch im Jahr 1954/55 abgschrisse worde. Dr Dokter Lüthi het i sire Dissertation über d Bedli im ämmitau aber no gseh, wo das Bad isch gstange u er heig o no e kabutte Wassersammler gfunge.
E Konzession het das Bad nie gha, me het auso nume chönne bade, nid aber treiche u ässe. D Wasserfassig muess öppe 150 Meter hingerem Badgeböide sy gsy. Ufem Geometerplan vo 1841 isch dert unger am Bach es Geböide yzeichnet. I ga drvo us, dass das d Queufassig isch gsy. Ds Wasser für ds Bade het me aues müesse uechetrage!
Es isch kes Wunger, dass das Ronachbad nie isch zum Kurbad usbout worde. Es isch haut, me muess es säge, scho e chly abgläge gsy. Aber bereits um 1850 isch däm Ronachbad no e Konkurränt anere bessere Steu vorem Glück gschtange. Dr Weibu Schüpbach het bim ehemalige Gaugehubu Land u nes auts Hüsli kouft u es nöis Badgeböide la boue. Dr Schüpbach u de speter si Nachfouger, dr Fritz Jenni, hei dert gwirtet u la bade.
D Strass vom Stocki uf Signou isch z mitts dür das Bad düre gange. Obedüre isch das Hus über d Strass bout worde.
1910 isch ferig gsy mit Bade u Wirte. Der Nachfouger het dert sis Malergschäft ygrichet. 1970 isch aues abgschrisse worde, wüu me het wöue d Umfahrigs-strass boue. Leider hani no kes Foto vo däm Huus gfunge.