Die zwöiti Ysebahnlinie, wo d Gmein Lützuflüeh betrifft, isch d Linie vo Ramsei über Grüenematt?–?Sumiswaud, wo früecher bis uf Huttu isch gange. Wo d Linie Burdlef?–?Langnou isch im 1881 z loufe cho, het me nachere Lösig gsuecht vo Ramsei uf Huttu. 1890 sy de grad zwöi Konzessionsgsuech fürne Bahnlinie vo Ramsei uf Sumiswaud ytroffe. Vom bärnische Regierigsrat isch de im Früehlig 1897 o e Konzession usgsteut worde. Aber 1905 het de dr Kanton Bärn e Bytrag müesse bewillige, für dass me die schwierige Bouproblem het chönne löse. Das het eifach viu Gäut brucht. Dr Gross Rat het de o grad e Abzweigig vo Sumiswaud gäge Wase bewilliget u 1,8 Millione Franke (hüt wär das guet u gärn ds Zähfache) grad säuber über-no. Im Jahr 1908 het me de die «RSHB» bout (Ramsei-Sumiswald-Huttwil-Bahn).
Am 1. Juni 1908 isch de die Bahnlinie scho eröffnet worde. Im Jahr 1919 isch d Bahn vo Burdlef uf Langnou ufe elektrisch Aatrieb umgsteut worde. Dampflokine sy nümme nötig gsy. Ersch im 1946 isch o d Linie Ramsei?–?Sumiswaud elektrisch worde. 1942 sy die Ämmitau-Bahne zur EBT (Emmental-Burgdorf-Thun-Bahn) vereinigt worde.
D Bahn säuber het nie rändiert, dr Staat Bärn het d Chöschte müesse übernäh. U im Jahr 2013 het d BLS die ganzi Konzession übernoh. Ramsei isch ursprünglich nüt angersch gsy weder Schacheland. Es het nume grad zwe Burehöf gha, nämlech dr «Hinger Ramsei», hüt d Familie Bärtschi, u ds Heimet «Vorder Ramsei»
vo Beck-Rysers. Drnäbe isch so um 1730 nume no ei Hof uf dr Woufstiege obe gsy, auso drü Hüser. Wyter unger, gäge dr Gouhuusbrügg, sy no es paar Tounerhüsli gstange, die hei aber dennzumale zur «Bleichi u Farb» ghört. I ha aber im Staatsarchiv e Plan gfunge von 1730. Dert gseht me, dass dennzumale e Kanau vo dr Wanneflueh furt dür Ramsei isch gfüehrt worde u vo dert zur Bleichi u Farb u de o zur Mühli ache. Die Mühli isch die hütegi «Kulturmühli».
Hüt isch Ramsei es wichtigs Gwärbzäntrum. Bekannt isch öppe d Firma, wo dr Paul Räss 1964 het gründet. Räss-Silo us Kunststoff sy dr Renner worde bi de Bure. Aagfage het är aber mit öppisch angerem, nämlech mit Schiff- u Wohnwagebou.