Was Probscht mitem Papscht z tüe het
Voletscht hei mi es paar Lüt gfragt, ob dr nöi Papscht Leo XIV (Robert Francis Prevost) nid öppe schwyzerischi Wurzle heig. «Prevost» gits tatsächlech unger de Schwyzer Familienäme, aber nid hie im Äntlibuech oder im Ämmitau.
Die Sach isch e chly komplizierter. Dr Grossätti vom Papscht isch e Salvatore Giovanni Riggitano gsy. Dä isch vo Sizilie uf Amerika usgwanderet. 1905 het är dr amerikanisch Pass übercho u bi dere Glägeheit sy Familie-name «Riggitano» uf «Prevost» la ändere – das isch nämlech dr Familiename vo sire Schwiegermueter gsy. Eso Änderige sie denn öppe vorcho, we dr Ybür-gerigs-Beamti miteme Name het Problem gha, het me haut e angere, einfachere, Name gno.
We me auso d Vorfahre vom hütige Papscht Leo XIV aaluegt, chunnt me uf italiänischi-französischi Vorfahre. Drzue chunnt sini Mueter, d Mildred Martinzez, us dr Region Louisiana u het kreolischi Vorfahre. Die stamme ab vo Portugiese, vo Sklave us Weschtafrika u vo de Urywohner vo Amerika. Dr Papscht Leo het auso Vorfahre vo verschiedenschte Egge vor Wäut – aber kener us der Schwyz. Dr Familiename Prevost gits aber o ir Schwyz, im Wäutsche u im Kanton Graubünde. Es git o die itauiänischi Variante «Prevosti». Prevost chunnt vor latinische Amtsbezeichnig «Praepositus = Aufseher». Das Grundwort chunnt o imene Familiename us dem Ämmitau vor: «Probscht». Die gits mit Heimatort Langnou u Lützelflüeh. Drnäbe fingt me dr Name o hüfiger im Kanton Solothurn u im St. Gallische. Bi de Lützuflüeh-Probscht het im Burechrieg dr Bänz Probscht muesse e Buess zahle, wüu är gäge d Obrigkeit grebelliert het. D Chäsexportfirma Probscht isch z Langnou bekannt u e Wilhelm Probscht isch um 1910 Regierigsstatthauter im Bezirk Signou gsy u dr Reymond Probst (1919 bis 2001), vo Langnou, ist Diplomat gsy u Botschafter vor Schwyz vo 1976 bis 1980 Botschafter in Washington.