Es paar Gschichte vo de Waudhus-Bure

Ufem Wäg vo Lützuflüeh uf Grüenematt chunnt me über d Äbeni vo Waudhus u Flüehle. Wo d Flüss no wiud u gfürchig sy gsy, het me über die Terrasse u Hügle müesse wandere. Wie fasch aui Terrasse über de Flüss isch o Waudhus scho lang besiedlet. Sicher het me dert im Mittuauter der Waud grodet. Aber ersch im Jahr 1256 chunnt Waudhus zersch Mau ire Urkunde vor. Dr Herr Konrad vo Brandis het dennzumale am Chloschter Trub d Heimet Waudhus u Flühle verchouft. Waudhus isch gäng bedütend gsy. D Familie, wo Waudhus u Flühle hei ghört, sy bedütend gsy im Ämmitau. So sy d Kipfer vo Langnou u d Kipfer vo Rüederswil diräkti Nachkomme vo de Waudhus-Kipfer. 1783 het me im Waudhus siebe Burehöf zeut, im Flüehle no vier. Ersch um 1800 ume het me im Waudhus die sogenannti Dreifäuderwirtschaft ufghobe. Au Bure hei gäng z gliche gmacht. Si hei ds Glyche aagsäit u pflanzet u de natürlech o gärntet. Me het däm «Flurzwang» gseit. Ei Drittu vom Land isch für d Winterfrucht, ei Drittu für Summerfrucht gsy u dr dritt Drittu het me gäng brach la sy, me het nüt aapflanzet u ds Land la ruije. Es paar Gschichtli vo de einzelne Höf chani scho verzeue, o weni de no es paar Wuche im Staatsarchiv hinger de grosse Foliante wirde hocke. Im Waudhus Nr. 3 (hüt Abt) het um 1850 dr Jakob Wäuti gläbt. Dä isch am Gotthäuf ds Byspiu füre Bodebuur gsy i de Ueli-Romane. Dr Hof het äbe de Kipfer ghört, die Familie, wo im Aute Bärn gäng dr Landesvenner het gsteut. Das isch dää gsi, wo im Chrieg hät d Fahne vom Ämmitau z trage gha. Waudhus Nr. 4 ghört syt 1860 der Familie Meister. D Marianne Meischter-Därendinger isch 1973 aus erschti Frou i Gmeinrat gwäut worde. Dr Hof Nr. 5 het o zu de Chipfer-Bsitzige hört. Dr Hof Nr. 11 (hüt Messer) isch dr ursprünglech Hof vor Familie Lüthi (vo Lützuflüh). 1793 het dr Isaak Lüthi das hütige Burehuus bout. Ufeme Keilstei steit «Y L A W». Das bedütet Ysaak Lüthi Anna Wäuti. Me het so guet wie nie e «I» gschribe, o mit Näme wo miteme «I» afö. Dr Hof säuber isch vermuetlech scho um 1550 im Bsitz vo Lühtis gsy. Genau ghört er gäng no der Familie, wiu die hütigi Bsitzere o e geboreni Lüthi isch.