Vo Glashouz, Latte u gar nüt

Höch über Oberdiessbach, grad ar Gränze zur Gmein Linde isch dr Ort «Glasholz». Scho das isch ja e ender exotische Name. Glas u Houz isch ja o ganz angers. Die Ortsbezeichnig isch sicher entstange, wüu dert Houz für Glashärstellig isch gärntet worde. Hüt isch dert es stotzigs Heimet, vor Jahrhunderte dörfti dert ufem ganze Bort Waud sy gstange. 

D Bezeichnig «Glashouz» dütet scho druf häre, dass es denn dert nid sehr hochwärtigs Houz het gha. Für d Glashärstellig het me eifach Heizmateriau brucht. Woni vornes paar Wuche i dere Gägend bi gsy, sy mir no es paar Ortsnäme ufgfaue, wo hie drzue passe. «I de Latte» isch so eine. So heisst e Bitz vom Waud grad näbe Glashouz. Das isch im Gebiet vor «Wuche-Zytig» e fasch einzigartigi Ortsbezeichnig. Nume no im Oberschlag, höch obe ar Schratteflueh gits dr «Lattewaud». O dert wachse offebar nume ender dünni, aber höch ufgschossni Tanne. Sie sy äbe früecher aus Latte brucht worde. Konkret sy die Tanne uf zwone Syte miteme Bieli flach gmacht worde, dass me se het chönne für ds Boue bruche. Zum Byspiu hets früecher so Latte für ds Dach brucht. Die sy de mit höuzige Nägu (meischens us Eiche) uf d Sparre gnaglet worde u dert druf sy de när d Schingle druf cho. Nächär hets o Latte brucht füre Zuun. Stachudraht hets vor Jahrhunderte no nid gä u e elektrische Hüeter sowieso nid. Dert hei de d Bure die Latte wenigstens nume müesse schinnte u nid no zwäghoue. Wüu dä Begriff im Bouwäse scho lang in Gebruch isch, erstuunts nid, dass es das Wort scho i dr authochdütsche Sprach het gä: «latto». Chly ungerhaub vo «i de Latte» gits de no e ganz einzigartegi Ortsbezeichnig «im Gibisnüt». Das gits im Ämmitau u Äntli­buech nume grad dert u ir ganze Schwyz nume öppe föif mau. «Gibisnüt» – was rein vom Klang här no luschtig tönt, isch vor Dütig här ärnscht gmeint: Dert git eim dr Bode nüt. Weme dä Ort ganz obe ir Gmein Oberdiessbach aaluegt, de gloubt me das schnäu. Dr Waud «Gibisnüt» isch ganz stotzig u mitts dürache louft no e Grabe ache. I däm änge Tääli sy früecher nid emau Latte gwachse wie obedranne.