E stotzige Wäg u ne urauti Bezeichnig

«Urstuwe» seit me amene Heimet  ygangs vom Dörfli Gohl ir Gmein Langnou. Die offizieui Schrybwys isch «Urstalden». Woni uf dr Charte dä Ort gseh ha, hani o grad däicht, dass isch sicher nid nume e Ur-Staude, sondern o uraut. Afe einisch isch ja bekannt, dass dä Fläcke Ärde scho vor Jahrhunderte bewohnt isch gsy. Grad obedranne isch d Burg Spitzebärg gstange. Die isch im Jahr 1299 vom Chloschter Trueb a d Habsburger verchouft worde u dr Hof «Urstalden» isch näbscht angerne i dr Choufurkunde erwähnt: «ein huoba ze Urstalden» – d Schrybwys isch auso scho vor über 700 Jahr genau so gsy wie hüt. «Huoba» steit für ds Wort «Hube», wo aber nüt mitere Chopfbedeckig z tüe het. Das authochdütsche Wort meint es Heimet, wo fix zunere Herrschaft ghört. I dr Choufurkunde vo dere Burg, wo übrigens dr Chünig Aubrächt vo Öschtrych ungerschribe het, steit o detailliert, was für ne Zins dass die Hube Urstaude het müesse ablifere: vier Viertle Dinku, vier Viertle Haber u vier Söi (wo jedes e Wärt vo sibe Schilling het müesse ha – dr Burgherr het auso de nid mageri Söili wöue!) Wie viu isch e Viertu gsy? Däich e Viertu vomene «Mütt» – itz syt dir im Biud! Es Mütt isch i dere Gägend um 160 Liter gsy u dr Viertu auso öppe 40 Liter.  Näbscht däm auem het Urstaude no zwöuf Schilling i Gäut müesse zinse. Dr Ortsnamen «Urstalden» isch sicher o i Zämehang mit dr Burg Spitzebärg entstange. Es isch ja zämegsetzti Bezeichnig. Ds Wort «Stalde» isch abgleitet vom Verb «stellen» so quasi im Sinn «dert, wos eim steut». Wäge, wo so stotzig sy gsy, dass me chuum ueche oder chuum gnue het chönne brämse für ache, sy natürlech bi de Lüt bekannt gsy. «Urstaude» het dä sicher e schlächte Ruef gha. D Silbe «Ur» meint nämlech, dass es dert bsungersch wiud u grob isch. Es het nämlech e Wäg vo Urstaude uf d Burg ueche gä. Dä isch vom Tau unger am Grabe nah u när, wos ganz stotzig wird, rächts abboge i Richtig vom hütige Heimet «Wannetu» u vo dert ume am Hang nah zrügg bis zur Burg. Wär einisch die Burgsteu isch ga aaluege, dä weiss, dass es dert «urstotzig» isch.