Frederick Haldemand in der britischen Uniform. / Bild: zvg
Dr Familiename Haudimaa (Haldemann oder Haldimann gschribe) hets scho i dr Zyt gä, wo Signou u Eggiwiu no zäme sy gsy. Dr Hof «Horbe» het dr Familie ghört, vermuetlech scho vor dr Reformation. Es git aber no angeri Haudimanne, wo nüt mit dene z tüe hei.
Dr Christian Haudimaa vo Horbe syg o aube ufe Märit uf Bärn. Wo Bärn verbotte het, dass d Bsuecher miteme Sabu i d Stadt dörfe, heig är dr Sabu am Bode nachezoge. Es heissi nume, me dörf dr Sabu nid trage, vo nachezieh stöng nüt i däm Befäut.
Vom Ueli Haudimaa, em Bsitzer vom Horbe, stamme aui Eggiwiuer Haudimaa ab, wo ir Zimmerzei, us Aeschle, vom Schönebode u vo Horbe chöme. Drzue isch eine vo de Sühn Eigetümer vom Hof Egg i dr Gmein Signou worde, vo däm Christe Haudimaa stamme aui Haldimann vo Signou ab. E wytere Stamm sy d Nachkomme vom Johann Haudimaa, wo 1699 dr Hof Lugibach kouft het. Är isch us Bowiu cho u het sech z Eggiwiu ykouft. Vo sinere Linie stamme d Haudimanne vor Martinsegg, vo Oberdiessbach, vom Fouz u vom Zimmerzei-Bärgli ab.
Übrigens: D Mueter vom Elon Musk, em Tesla-Chef, isch o e Haudimaa. Si hei e Stammboum, wüsse aber nid, öb dä uf Eggiwiu, Signou oder Bowiu zrugg gieng.
Wyter hani no e Linie gfunge, wo us Signou chunnt, aber scho um 1640 z Bärn het gwohnt. E Peter Haudimann isch das gsy. Es isch müglich, dass är vor Scheidegg isch cho, amene Hof, wo hüt o zu Eggiwiu ghört. Si Suhn, Chasper, isch aus Küefer u Wyhändler uf Yverdon uswanderet. Dr «Gaspard Haldimand» wie me ihm dert het gseit, het ghürate u e Zilete Ching gha. Eine vo de Nachkomme isch dr Frederic Haldemand gsy, wo 1718 isch uf d Wäut cho. 1740 isch är bi de Preusse ga chriege u isch 1748 Kommandant vo de Schwyzer Truppe z Holland worde. 1756 hei ne d Ängländer gfragt, öb är ds Kommando vo de Truppe im amerikanische Pennsylvanie würd übernäh.
Är isch de vo 1778 bis 1786 sogar no Gouverneur vo Quebec worde. 1785 isch är Mitglied vom Bath-Orde worde; das isch nachem Hosebandorde die zwöithöchschti Ehr z Grossbritannie. I de aute Tage isch är zrügg i d Schwyz cho u het sech bi Yverdon niederglah.