Ds Heimet mittler Stärenbärg ligt im ghögerige Gebiet. / Bild: Bruno Zürcher (zue)
Wüsst dir, was e «Stär» isch? We dir dr
Titu heit gläse, de wüsst dir ömu afe, dass dä gärn Gras frisst. U das mache Schafböck. Dr Ursprung vom Wort
«Stär» isch ds authochdütsche «stero», wo äbe Schafbock oder Widder bedütet, wie dr Fachmaa seit. Us däm isch de
ir mittuhochdütsche Sprach «stëre» entstange u de im Schwyzerdütsche ds Wort «Stär».Wenn dass das usem
Sprachgebruch isch cho, weiss i nid genau. Dank es paarne Ortsnäme gits das Wort hüt überhoupt no, zwe dervo sy
im Ämmitau. Im Äntlibuech hani zu
däm Wort ke Ortsname gfunge. D «Stärenegg» ir Gmein
Truebschache isch hüt sicher viune Lüt e Begriff, wägem Jugendheim, wos dert obe het. I historische Dokumänt
hani die ungeri, die vorderi, die mittleri u die hingeri «Stärenegg» gfunge. Auerdings nid i sehr aute Akte,
was aber da dranne cha lige, dass d Gmein Truebschache no «zimli nöi» isch u das Gebiet vorhär zu Trueb oder
Louperschwiu het ghört. Wäsentlech euter sy de
d Queue zu de Heimet «Stärenberg» ir Gmein Langnou. Scho im Urbar über d Ränte, Gülte u Chorn- u Höizähnte
«des Hauses Trub» usem Jahr 1531 isch «das Guott
Stärrennberg» erwähnt.
Bi beidne dörfti die Bezeichnig äbe
wägeme Schafbock entstange sy. Die Ört chöi so dütet wärde: Dert, wos e Widder het. Vo dr Topographie här macht d
Schafhautig o Sinn. A beidne Orte isch es nid grad äben. Bim «Stärenberg»
südlech vo Langnou steut sech no d Frag, öb die Ortsbezeichnig nüt mit «Stärn» z tüe het. I de Amtsrächnige usem
Jahr 1645 isch nämlech «ober Stärnenbärg» u «nider Stärnenbärg» notiert worde. Ortsnäme mit «Stärn» gits, aber
nid im Gebiet vor Wuche-Zytig. E Zämehang mit de Stärne am Himmu hets bi dene fasch nie – usser bi Steue, wo
höch obe sy, wo me d Stärne guet gseht. Meistens
düte «Stärn»- Ortsnäme uf Blueme
häre, wo d Blüete wiene Stärn usgseh; zum Byspiu d Oschterglogge. Es isch müglech, dass
bi de «Stärnebärg»-Heimet viu Blueme mit stärnförmige Blüete sy gwachse. D Schribwys i de eutische Dokumänt
dütet aber ender uf«Stär» auso Schafbock häre – u die Blueme hätti o dä nid gfrässe.