Süssigkeite hets scho früecher gä. Gsüesst het me mit Hungg. Zucker isch sehr säute u tüür gsy. Zersch hei d Araber dä glieferet. Ab 1500 isch de Zuckerrohr o i de nöie Kolonie vo de Spanier u Portugiese aapflanzt worde. Drmit isch dr Prys e chly abecho u me het Zucker o ir Chuchi chönne bruche. Im Chochbuech vo Bärn vo 1750 finge mir de scho es paar Rezäpt. Zum Byspiiu eis vomene Mandu-Mues: Mandle u Nidle so lang vermörsere, bis me e einheitleche Brei überchunnt. De nimmt me vier Eiwyss, Zucker u Zimmet u rüehrt das bis es wieder e Brei git. De chunnt aues ine Form mit emene Dechu u me tuet das bache.
Nach em Bärner Chochbuech het me denn näben Hungg u em Rohrzucker o ykocheti Frücht aus Süessstoff kennt. Öpfu hets süessi u suuri gä. Die süesse Öpfuschnitz sy tüürer gsy weder die suure. I ha o gläse, dass me Trubesaft u Biresaft het ykochet, bis me e Sirup heig überchoo u das aus Süessstoff brucht heig. Ykochete Biresaft wird hüt no aus «Birnel» verchouft. Bis um 1800 isch das i Huushautige viu brucht worde.
Im Chochbuech vo 1750 sy viu Rezäpt drinne, aber fasch gäng nume aus Zuetatelischte. Es wär spannend, da öppis drus z mache, aber da würdi e Konditer bruche, wo würd häufe.
Für mis Menü hani Zuckerbrot la mache. Mit em glyche Rezäpt hani auerdings zwo verschieden Lösige übercho. Aber eis isch klar – guet sy beide gsy.
Dessär mit Eier u Mäu sy ganz wichtig gsy. Sache, wo me hüt no kennt, wie Schänkeli, Chnöiblätze oder Rosechüechli. Zucker u Zimmet hets natürlech nume bi de ryche Lüt gää. Im Buech finge mir ds Rezäpt für wyssi Zucker-Strübli: 3 Teil Wyssmäu u 1 Teil Zucker tuet me mit Eiwyss u Rosewasser vermische bis me e zarte, fasch no flüssige Teig überchunnt. Itze macht me dr Anke warm u de cha me die Masse mitemene Trichter mit emene chlyne Loch i ds heisse Ankefett la loufe. Me muess aber luege, dass es nid z dunku wird, die Strübli müesse wyss blibe.
O Brot schynt me zu öppis süessem gmacht z ha. Im Rezäpt 227 steit: Nimm auts Wyssbrot, tues i nes Gschir brösmele, heissi Miuech drüber, u las das e Zytlang la schtaa. Drnah mues me das no fin mische u mixe. De chöme es paar Eier dry bis me e Brüe-Teig überchunnt. O das wird wieder dür ne Trachter zu «Girgelein» im heisse Anke gmacht.