Error compiling Razor Template (contact the administrator for more details)

Was meint eigentlech dr Name Leibundgut?

Was meint eigentlech dr Name Leibundgut?
E Schliffschibe vo 1815. / Bild: zvg

Chürzlech het mi öpper gfragt, warum siner Vorfahre dr Name Leibundgut heige übercho.

Dr Name chunnt autygsässe nume grad i de Gemeinde Aarwange, Affoutere im Ämmitau, Brittnou, Langethau, Mäuchnou, Rüegsou, Wyssache u im Solothurnische Schnottwil vor. Trotzdäm gits no hüt über 1500 Lüt, wo so heisse.

Die Bezeichnig isch rächt aut. Inere Urkunde us Basu isch dä Name scho um 1250 erwähnt.

Im Ämmitau isch dä Name scho i de eutischte Chiuchebücher z finge, genauso wie z Rüegsou oder z Eriswiu. Z Affoutere isch no öppis Bsungrigs, wüu e Ulli Lybundguet 1715 aus Schmied z Affoutere het gwärchet, är aber Meischter ir Zunft zu Huefschmiede vom Ämmitau isch gsy. Dr Landvogt ihm de e Voumacht im Name vor ämmitaler Handwärcherzunft usgschteut u begloubiget. So het är chönne Lehrlinge prüefe.

E angere Lybuguet vo Affoutere het sech aus Glasermeischter i de Jahr um 1760 e Name gmacht, wüu är Glasschibe, -sogenannti Schlyffschibe, het gmacht u verchouft. Es isch denzumale Bruch gsy, amene Nachbar, wo es nöis Huus het bout, e sones Fäischterglas z schänke. Glas isch dezumale öppis vom Türschte gsy, wos het brucht bim Nöibou vomene Huus. De het me gärn si Name druf la yritze u es Wappe, so dass die Familie im nöie Huus gäng gwüsst het, vo wäm si die Schibe het überchoo. 

E chly weniger ruhmrych isch Karriere vom Jakob Lybundgut verloffe, är isch nämlich 1836 z Froubrunne aus Roubmörder um ei Chopf kürzt worde.

Aber am Schluss no öpps zur Bedütig vom Name: Es isch vermuetlech öpper gsy, wo sis Vermöge öpperem het gää, wo derfür nid het müesse e Choufprys zahle, aber ihn ds Läbe lang verpflegt u versorget. Me seit däm hüt öppe o e Pfrundvertrag. Die Formulierig «lieb und guet» het me gseit, wo äbe öpper so das Vermöge abträtte het u der-für isch versorgt worde.

03.11.2022 :: Hans Minder