Error compiling Razor Template (contact the administrator for more details)

Im Eggiwiu hets viu Gwärb gää

I däm Verzeichnis vom Pfarrer vo Eggiwiu hani o gseh, dass es fasch i jedem Bezirk e Schumacher het gää. 

Wyter het im Gäzistiu e Chessler gschaffet. Zum Nachberhuus vom Chessler steit i dere Lischte, wo dr Pfarrer um 1785 het gmacht: D Frou wohni alleini mit de Ching dert; ihre Maa syg i frömde Dientschte. Das isch übrigens no a angerne Orte ytrage. Im Dennli isch denn sogar e Dokter gsy. Dr Samuel Küpfer, e Louperschwiuer, het dert sini Praxis gha. 

Natürlech isch o d Öli erwähnt. Die isch scho aut! D Wasserrächt het nämlech no dr Prior vom Chlöschterli z Röthebach am Öler vo Eggiwiu gää. Dert, wo itze d Firma Stomeg isch, isch äbe die Öli gsy. Ersch Stettlers hei us däm Betrieb e Müli gmacht. E Wagner het ir Luchsmatte gwärchet, uf em Chnubu het dr Sattler Hirschi gwohnt u drzue no e Schnyder. Die angere zwe Schnyder im Eggiwiu sy im Sorbach u im Fröschbach gsy. 

Vom hüt bekannte Gebiet Sieche  isch nume grad dr Chnubu besiedlet gsy, dr Räschte vom Land sy Aupwirtschafte gsy. Wüu eini vo de gröschte Aupe dert am «Siechehuus» vo Bärn het ghört, heisst dä Ort hüt no Sieche. Aus «Sieche» sy im Mittuhochdütsche Ussätzigi betitlet worde. D Chrankheit Ussatz kennt me hüt aus Lepra. 

Im Heidbühl – «Hiipu» – isch e Anketräger gwohnt. Är het bi de Bure u Senne dr Anke kouft u de dä i d Stett brunge. Im Chrummbach isch dr Garnbucher Peter Kräjebüeu gwohnt u grad näbedranne dr Schryner Hans Burger.

Im glyche Gebiet isch o e Seilerei gsy. 

I dr Glashütte isch dr Schueumeischter Peter Bärtschi gwohnt, wo o dr Poschte vom Gmeindsschryber het gha! Im Hiipu hets o zwe Drechsler gha. Gwärb hets o ir Längmatt gää: afe einisch e Beck, zwo Naguschmitte u grad zwe Zimmermanne. E wytere Zimmermaa isch uf der Steiglere gwohnt (Hans Badertscher) u einie uf Nöieschwand, dr Hans Bichsu. E Küefer isch im Badschwändeli gsy u zum Schluss isch no uf em Bärg obe o no e Schmitte gsy (bim Höllstäg!). Im Diebolswylerschache isch e Ueli Badertscher ytrage gsy, wo Büchsemacher isch gsy. 

Zimli aut isch o d Aeschou-Mühli. 1785 isch dert dr Chrischte Galli Müuer gsy, zäme mit sim Suhn u emene Lächemüuer. 

Im Aeschau gits o es Schlössli: Dert het dr Schumacher Andreas Meyer us Bülach gwohnt – dennzumau dr einzig Ussländer im Eggiwiu. 

Am Schluss vom Verzeichnis sy d Aupe ytreit, wo nume im Summer sy bewirtschaftet worde. 54 Aupe chame uf dere Lyschte läse mit totau 1500 Chue-Rächt. Viu vo dene Aupe hei de Gnädige Herre ghört. So zum Byspiu o d Rämisgumme, wo 1785 dr Frou Landvögtin vo Frisching vo Rümlige het ghört. 

19.05.2022 :: Hans Minder