Error compiling Razor Template (contact the administrator for more details)

Zersch hets viu Waud gha, när kene meh

Näb dr Landwirtschaft het im Eggiwiu frücher o dr Waud, wo no grösser isch gsy aus hüt, Gäut gä. Es isch Houzchole gmacht worde, aber me het o ganzi Stämm uf Floss bis uf Basu ache gschickt. Bim Läse vo Ungerlaage, wo mir i Archiv hei übercho, isch vo 1843 es Verzeichnis fürecho, wo aui Floss us däm Jahr sy verzeichnet gsy, wär se het gfahre u wohäre die Tanne sy gschickt worde. 

Uf de Aupe, wo meischtens de Gnädige Herre hei ghört, isch gkäset worde. Die erschte beide Aupe im Eggiwiutau sy de vo Chapf u vo Netschbüeu gsy, wo 1529 dr Herrschaft Signou hei ghört. Die angere hütige Aupe, bsungerbar Rämisgumme, sy ersch später grodet u aus Aup gnützt worde. Vo Rämisgumme weisse me ab 1650, dass me dert Veh het gaupet. 

Steimoos uf em Sieche isch ab 1676 aus Aup ygrichtet worde. Die intensivi Aup- u d Waudwirtschaft het aber bedütet, dass fasch aui Wäuder bis 1800 sy verschwunde gsy. Nach schwäre Überschwemmige het me de ab 1800 wieder aagfange, Waud ufzforschte. I de 1850er Jahr het me viu Aupe i sogenannti Ganzjahresbetriebe umgwandlet u het drum o viu vo de Sumpfgebiet entwässeret. 


Im 1850 isch Gmein Eggiwiu i nün Schuekreise ufteilt gsy: Nöieschwand, Horbe, Dorf (oder Heipuu), Hindte, Läber, Niederbärg, Pfaffemoos, Sieche u Chapf. A ja, no öppis isch spezieu a dr Gmein Eggiwiu: D Ywohnergmein u d Chiuch-gmein sy nid glich gross. E Teil vom Pfaffemoos ghört zur Chiuchgmein Schangnou. So syg es scho vorcho, dass dr Presidänt vor Ywohnergmein Eggiwiu glichzytig o no dr Presidänt vor Chiuchgmein Schangnou isch gsy! He nu, solangs zwüsche Eggiwiu u Schangnou nid zum Chrieg chunnt, cha das öppe chuum es Problem sy.

Dr Pfarrer vo Eggiwiu het um 1785 es Büechli gschribe, wo är vo Huus zu Huus gange isch u ufgschribe het, wär dert wohnt u was die mache. Dert isch o z gseh, das tatsächlech dr Löie die eutischti Wirtschaft vom Eggiwiu isch. Im 1785 isch d Witwe Burgdorfer-Hagi dert d Wirti gsy. Grad viu isch vermuetlech nid gange, sie isch alleini ir Wirtschaft gsy, nume grad e Magd het si gha. 

I däm Verzeichnis hani näb de Bure o angeri Brüef gfunge. So sy Stettlers scho uf dr Müli im Dorf gsy u e Saagi hets denn o scho gää. Im Müliguet isch o e Metzger gsy u dr David Stettler im Dorf isch vo Bruef Bot gsy. Das isch so öppis zwüsche Briefträger u Transporteur gsy. D Gärberei het denn no funktioniert. Dr Bsitzer isch e Hans Jakob Hotz gsy, eine vo Grinduwaud. Die Hotze hets o a an- 

gerne Orte gä, öppe z Burtlef oder z Huttu. Hotz isch es Wasemeischter-, Hänker- u Scharfrichter-Gschlächt!

05.05.2022 :: Hans Minder