Bim Bou vor Chiuche vo Eggiwiu isch es e chly komisch zue u här gange. Obschon Bärn scho über hundert Jahr isch reformiert gsy, het d Obrigkeit vo Bärn füre Bou vo dere nöie Chiuche e katholische Architekt aagsteut. Bärn het ihm aber wüchentlech erloubt uf Marbach z ga, das er dert chönn d Mäss bsueche – zaut het die Reis ds reformierte Bärn!
Dr Chiuchebou isch rächt guet dokumentiert, wüu ja Bärn aus het zaut, u me das aus cha nacheläse. O dr Steiner het i sim Buech über Eggiwiu u Röthebach drüber gschribe.
Es sy natürlech o uswärtegi Handwärker a dere Chiuche dranne gsy. Es söu sogar so sy, dass d Familie Peter wäge däm isch ybürgeret worde. E Maa mit Nachname Peter syg aus Handwärker drby gsy u z Eggiwiu blibe. Ob das stimmt, chan i no nid säge. I ha nume afe usegfunge, dass 1670 d Almose-Chammere z Bärn het entschiede, dass e Familie Peter uf Trueb u uf Eggiwiu müess ufteilt wärde! Es git dä Familiename o hüt nume z Trueb u z Eggiwiu.
Was spezieu isch, es git us em Mittuauter sibe Höf, wo kener Stüre hei müesse zahle. Dr Grund isch, dass die Höf zum Bsitz vo de Herre vo Eggiwiu u speter vo de Herre vo Schwinsbärg hei ghört. Die vo Eggiwiu sy usgstorbe u d Schwinsbärger hei sech im Urnerland niederglaa u dr Name «von Attinghausen» übernoo.
1436 het Bärn bestätiget, dass d Bsitzer vo de Höf Nöieschwand, Scheidegg, Äschou, Dieboldswiu u Dieboudsbach kener Stüre müesse zahle. Es isch gäng vo siebe Höf d Red, i däiche aber, dass vermuetich uf Nöieschwand oder im Aeschou scho denn mehreri Heimet sy gsy. Mindeschtens d Mühli im Äschou isch scho gsy u het zur «Bürg» ghört. Me cha hüt no gseh, wo die Burg isch gstange. Nume grad am Weibu u am Bannwart vor Herrschaft Signou hei d Bsitzer vo dene Höf müesse e Obolus abliefere.
D Obrigkeit het ja die Chiuche o bout, für gäge d Töifer vorzga. Bärn het nid nume e Pfarrer uf Eggiwiu gschickt, sondern o es Chorgricht ygsetzt. Die erschte Chorrichter sy am 26. Novämber 1648 ir Chiuche zämecho. D Mitglieder sy gsy dr speter Burefüehrer Ueli Galli, dr Chlous Wittwer, dr Samuel Burgdorfer, dr Ueli Sauzme, dr Jakob Hebiise u dr Michu Haudimaa. Au die Gschlächter gits o hüt no unger de Bürger vo Eggiwiu!