Error compiling Razor Template (contact the administrator for more details)

Wäg de Töifer hets d Gmein Eggiwiu gä

Im Ämmitau sy zwo Gmeinde nid so aut wie die angere. Da isch afe einisch Truebschache. Das het früecher «Loupersch-
wiuviertu» gheisse u Teile hei o no zu de Gmeinde Langnou u Trueb ghört. Die zwöiti Gmein isch Eggiwiu. Bis 1648 het Eggiwiu nämlech zu Signou ghört, oder besser gseit: Ds Gebiet vor hütige Gmein Eggiwiu isch e Teil vor Chirchgmein Signou gsy. Drfür het dr Hälischwang no zu de Gmeinde Loupersch-
wiu u Rüederschwiu ghört; u ds Bärggebiet vom Bärg bis i d Hingeregg het aus Exklave «Rothchrut» sogar zur Pfarrei Bigle ghört. Es isch auso nid ganz eifach gsy. 

Wo de d Reformation isch cho, sy hüüfe Lüt z Signou zur Töifergemein gange, wo aber im aute Bärn ja nid isch anerchennt worde. Die Gnädige Herre hei ganz ungnädig die Töifer verfougt, hei se ertränkt, verjagt u enteignet. Bärn het sogar es eigets Minischterium für Töiferverfougig gha. I däm Eggiwiutau hei sech auso viu Töifer versteckt u dr Pfarrer vo Signou isch nid mit ne fertig worde. D Gmein isch viu z gross gsy.
Bärn het schliesslich uf Chöschte vom Staat ufeme Fäud ir Neechi vom Dörfli Heidbüeu – «Heipu» – e nöii Chiuche la boue u wo das aus isch ygrichtet gsy isch die nöii Gmein Eggiwiu im Jahr 1648 säubständig worde u het e eigete Pfarrer überchoo. Ufe erscht Pfarrer, dä het Daniel Schaffner gheisse, isch scho 1649 e Mordaaschlag verüebt worde. Öpper het nämlech z Nacht e mörderische Stei i ds Schlafzimmer vom Pfarrhuus gschosse, aber dr Stei het dr Pfarrer im Bett nid breicht. 

Warum Eggiwiu aber Eggiwiu heisst, bini no nid fündig worde. Es het zwar es Adusgschlächt «von Eggiwil» gää, aber uf dr Schöpf-Charte von 1578 isch ke Ortschaft «Eggiwiu» z finge. Nume ds Tau vom Aeschau bis zum Heipu het «im Eggenwyl» gheisse. Dert wo hüt ds Dorf isch, isch uf der Charte vo 1578 no nüt. Es het äue nid viu gfäut u Eggiwiu würd hüt «Gemeinde Heidbühl» heisse. 

Es wäutlechs Gricht isch z Eggiwiu nid ygrichtet worde, das isch nämlich bi Signou blibe. Wes e Rächtshandu het gää, het me das im grössere Teil vo Eggiwiu im Grichtshus zum Rothe Thurm z Signou verhandlet, aber e Teil vo Eggiwiu isch o bim Gricht Röthebach gsy. Das wird de no ganz e interessanti Sach zum Forsche. Röthebach isch nämlech es eigets Gebiet gsy, wo bis zur Reformation zum Orde vo Cluny z Frankrych het ghört. Das Priorat, wo dert isch gsy, wo hüt der «Bäre» steit, het zu Rüeggisbärg ghört. Röthebach u Rüeggisbärg sy am Jakobswäg gläge, wo vom Norde vo Europa zum Grab vom Heilige Jakobus z Santiago de Compostela gefüehrt het. O ds Chiuchli z Würzbrunne isch e wichtige Waufahrtsort uf däm Wäg gsy. Auso schwär katholisch!

07.04.2022 :: Hans Minder