«Täntsch» isch scho vom Klang här es richtigs bärndütsches Wort. U ja, das Wort hani aus Ortsnäme im Äntlibuech auso nid gfunge. Es isch o im Ämmitau zimli säute worde, aber öppe es Haubdotze Ortsnäme mit däm Wort drinne gits.
Z Schlosswiu heisst e Äbeni bi de Heimet Weierguet «Täntsch», u das scho zimli lang.
Ganz öppis angersch isch gmeint, weme z Bigle vom «Täntsch» redt. Dert gits nämlech o eine. Öb me hüt däm Wäg, wo vom Dorf gägem Wyler Änetbach ueche geit, no so seit, weiss i auerdings nid. Aber i aute Dokumänt isch dä eso benamset worde. Was hei itz die beide Ortsbezeichnige – e Äbeni u e Wäg – gmeinsam? Es het dert zämedrückte Härd. Dr Wäg gäge Änetbach ueche geit über ne chlyne Damm. U ds Wort «Täntsch» bim Weierguet z Schlosswiu meint äbe nid d Äbeni sondern dr Damm, wos dert drumum het. Dass e natürleche Damm äbefaus dr Name «Täntsch» het übercho, isch äue ender d Usnahm. Dr klassisch Täntsch fingt me a de Gwässer naa. Vor nid langer Zyt het mer eine erklärt, dass es im Rüegsouschache nid viu Platz für d Strass heig, wüus ar Ämme naa e Täntsch heig. Es het no angerne Orte eso Dämm, für dass ds Wasser nid näbedüre geit. Z Lützuflüeh gits dr «Täntsch-Acher». Dass es o bi chlynere Gwässer eso ne Erhöchig brucht, bewyst d Bezeichnig «Gräblitäntsch» ir Gmein Langnou.
Nüt mit zämedrücktem Härd z tüe het dr Ortsname «Tämperte». Eso heisse zwöi Heimet weschtlech vo Marbach. Dä Ortsname gits ir ganze Schwyz nume dert! O hie isch es auts Wort dr Ursprung. I ha mi natürlech gfragt, öb äch das Wort e typische Äntlibuecher Begriff isch, wüu die Heimet ja ir Gmein Äschlismatt-Marbach lige – aber d Gränze zum Kanton Bärn isch äbe nach. Uf au Fäu isch im schwyzerdütsche Wörterbuech, Idiotikon, bi däm Begriff afe einisch dr Gotthäuf erwähnt. Dä het das «Tämperte» ömu kennt. Das Wort meint so viu wie «dasume plämperle» oder «längwilig öppis verzeue». Wie das Wort zu dene Heimet isch cho, isch nid ganz klar. Wahrschynlech isch es dür ne Scherzname vomene früechere Bsitzer entstange. Das isch aber scho lenger här. Dr eutischt Ytrag isch usem Jahr 1676!
Queue: «Ortsnamenbuch des Kantons Bern», «Orts- und Flurnamen des Amtes Entlebuch», idiotikon.ch u wyteri. Aafrage: 034 409 40 05 oder zuercher@wochen-zeitung.ch