Chürzlech hani ume einisch e Ortsname gfunge, wos ir ganze Schwyz nume einisch git (u glücklecherwys im Gebiet vor Wuche-Zytig): «Finet» ir Gmein Arni. Dass das sone einzigartegi Sach isch, ligt eigentlech nid unbedingt am Wort, sondern da- dranne, dass dä Ortsname im Louf vor Zyt e chly isch umgformet worde. I Dokumänt usem Jahr 1771 steit nämlech no «Finiz» – u das gits im Kanton Bärn scho no öppe es Dotze Mau.
Das Heimet «Finet» isch ganz ir Nechi vo Arnibärg amene stotzige Bord z finge. Dert isch natürlech scho vor Jahrhunderte ghöiet worde u villech isch ds Höi imene «Finiz» yglageret worde – das Wort bedütet nämlech so viu wie «Höischüür». Wüu das Wort mit dr Zyt äue nümme so gebrüchlech isch gsy u das Huus villech zumene eigeständige Heimetli isch worde, het sech de o dä Ortsname gänderet.
Ganz ähnlech tönt «Finishütte» ir Gmein Schüpfheim. I ha im erschte Momänt aber däicht, die Bezeichnig heig nüt mit «Vinelz» am Huet, sondern miteme Vorname: «Fini» isch e Churzform vo Josephine u im Äntlibuech früecher no zimli verbreitet gsy. De wär d Dütig ja eifach: «Das isch d Hütte vom Fini». – Wär, wüu weme zum Byspiu die euteschti Erwähnig aaluegt, de gseht die Sach de angersch us. 1642 isch nämlech «Fineshüten» notiert worde – das isch zimli angersch aus «Fini».
Ds Bärgheimet «Finishütte» isch südlech vo Schüpfheim z finge u liegt uf rund 1300 Meter über Meer. Grad obedranne isch d Schafmatt, wo de scho fasch 2000 Meter höch isch. Es isch guet müglech, dass es i däm wytlöifige u stotzige Gebiet eso Höihütte het gha. Das heisst, dr Ursprung isch dr glych, wie bim Heimet «Finet». Sprachforscher hei usegfunge, dass ds Wort «Finiz» im Sinn vo Höihütte vor auem im weschtleche Teu vor Dütschschwyz z finge isch,
«Finishütte» dörfti auso eine vo de öschtlechschte Ortsnäme mit däm aute Wort sy. Richtig warm worde sy d Lüt mit dere Bezeichnig nid: Scho 1683 toucht «Fÿniss hütten» uf. Z Arni het sech «Finiz» viu lenger ghaute: «Finet» toucht ersch im Jahr 1838 zerschmau uf. Luschtigerwys sy a beidne Orte die Bezeichnige eso aapasst worde, dass es aui guet hei chönne säge – das isch ja ds Wichtigschte.
Queue: «Ortsnamenbuch des Kantons Bern», «Orts- und Flurnamen des Amtes Entlebuch», www.idiotikon.ch u wyteri. Aafrage: 034 409 40 05 oder zuercher@wochen-zeitung.ch