Dert, wo me bau es Seili brucht

Wär ufe «Strick» wot, brucht fasch es Seili für sech z sichere. Ömu gits dert churz vorem Gipfu e chlyni Passage, wome hurti chly muess chlättere. Dr «Strick» isch e Gipfu im nördleche Teu vo dr Schratteflueh, u weme de dobe isch, de steit me uf 1947 Meter über Meer. 

Zu sim Name isch dä Bärg aber nid cho, wüu me dert es Seili oder äbe e Strick brucht – ömu nid diräkt. Das Wort bezeichnet augemein e ganz steili, schmali Wägsteue. Ds Wort «Strick» stammt vom authochdütsche «stric», wo denn so viu wie «Seili» oder «Schlinge» het bedütet. Die töiferi Härkunft isch nid bekannt.

Dä Gipfu isch bereits im Hochwaudbuech usem Jahr 1433 erwähnt. U dr Ytrag zeigt de o no grad, dass es dert äbe so steil isch, das nume Gemschi dert guet hei chönne dasumechlättere: «den ober gemtschen strick». Dä Zuesatz mit de Gemschi het sech de zimli lang gha. Inere Beschrybig vo verschiedene Bärge usem Jahr 1783 steit «Gemsstricke». 1822 isch de im Verzeichnis vo de ykassierte Gülte vo Flüehli nume no «Strick» notiert worde. E Steu chly weschtlech vom Strick treit de no dr Name «Stricksättili», was sech klar mit dr Form laht la erkläre. 

Itz gömer i Nessugrabe ir Gmein Rüederswiu. Zimli hinger gits dert zwöi Heimet, wo «Strick» heisse. Dä Ortsname dörfti o wäge dr früecher ender steile Zuefahrt z stang sy cho. Müglech isch aber o, dass die Bezeichnig uf d Form vom Gländ zrügggeit. «Strick» wird nämlech i Ortsnäme o brucht für längi, schmali Streife. 

Bi dr «Strickegg» bi Äschlismatt dörfti das sicher dr Fau sy. Dert gits e Streife Land, wo praktisch vom Tau unger bis a Grat vor Beichle uechegeit. Mittsdrinne hets e Gländeterrasse, wo de äbe d Egg im Strick isch. 

Ganz ir Neechi vo dr Hohwacht ir Gmein Langnou gits o no e Ort, wo «Strick» heisst. Das isch e schmali Aahöchi, wo sicher o wäge sire Form eso bezeichnet worde isch. 

Es git o ganz weni Steue, wo nume e Strich breit sy: Die schmale Grasstreife ar Schratte-
flueh oberhaub vor Aup Silwänge, ir Gmein Flüehli, heisse drum «Strichwäng». O es Flueband bim Chummewaud ir Gmein Schüpfheim isch eso zu sim Name cho: «Strichflue».  


Queue: «Ortsnamenbuch des Kantons Bern», «Orts- und Flurnamen des Amtes Entlebuch», idiotikon.ch u wyteri. Aafrage: 034 409 40 05 oder zuercher@wochen-zeitung.ch

24.09.2020 :: Bruno Zürcher (zue)