Am Morge am haubi sächsi het dr Hans Kuehn vom Hämubach Bsuech übercho. Vor dr Tür gstange isch si Brüetsch, Niklous Kuehn. Es isch dr 26. Septämber 1754 gsy, auso dä Tag, wo e jungi Frou useme Schürli im Hämubach es komisches Ächze vomene Mönsch het ghört – u e Tag speter e tote Maa isch gfunge worde. Dr Hans, wo mit sim Brüetsch äue nid grad viu Kontakt het gha, het speter zu Protokou gä, dass ne dr Niklous gfragt heig, wäge Gäut, wüu är wöu hürate. Dr Hans het ihm ke Gäut gä, aber «etwelche Eyer gekocht und Milch darzu gegeben, welches er käümerlich genießen wollen». När syg dr Niklous Kuehn gange. Aber scho bevor dr Niklous hei zum Brüetsch isch gange, het
ihn öpper gseh. Dr Murergseu Chrischte Murhofer, wo a däm Morge dür ds Täli ache gloffe isch. Är het gseit, dass är dr Niklous Kuehn bi däm Schürli heig gseh usecho. Är heig ihm d Hang gä u e schöne Tag gwünscht. Öb dä Tag für dä jung Maa (är isch 27- oder 28-jährig gsy) schön isch gsy, chame bezwyfle. Me het ihn bim Schürli gseh, wo e Maa drinne isch gläge, wo i de letschte Züüg isch gsy. Entweder het dr Kuehn däicht, dass die Lyche ewig lang nid entdeckt wärdi, oder är het eifach ungloublech Närve gha. Är isch nämlech nid sofort gflüchtet, sondern afe einisch uf Chröschebrunne ache. Im «Bäre» het är zwöi Vierteli Wyy bsteut, wie Züge speter usgseit hei, u het o dert gschlafe. Am nächschte Morge isch är de aber los. Wyt isch är nid cho. Dr Landvogt het befohle, nach däm Flüchtige Usschou z haute. Es tüecht eim, vor 270 Jahr hät doch e Maa, wo z Fuess ungerwägs isch gsy, unendeckt söue blybe. Aber d Kommunikation het offebar o ohni Funk u Händy zügig funktioniert: «Ein Harschierer der von jhme Luft bekommen, jagte jhme zuo Pfert nach und arretierte dennselben zuo Gmeiß», steit i de Criminal Proceduren Teütschen Lands de Anno 1754». Dr Niklous Kuehn isch de ufem Schloss Signou ygsperrt worde. Scho ufem Wäg uf Signou heig är zuegä, dä Maa tötet z ha. Wüu aber Hämubach zur Landvogtei Trachsuwaud het ghört, isch är när i das Schloss züglet worde. Dr Landvogt Tscharner het sim Gfängnis aber nid ganz trout – es syge scho Lüt «entwichen». Wäge däm het är es Gsuech gsteut, für dä Delikwänt uf Bärn chönne z lifere. Bärn het gseit: Nobis. Dr Tscharner söu dä Maa bhaute u «wohl verwahren».
Immerhin isch itz o klar gsy, wär dr Tot isch: Dr Hans Heimbärg us «Oberwÿl im Simmenthal». Är isch am 30. Septämber, auso vier Tag nach dr Tat, beärdiget worde. Im Toterodu vo Trueb steit drzue: «welcher grausammer Weise ermordet ward, deßen Leib in der Stille auf dem Kirchhof begraben ward.»