Dr Willy Burgdorfer het d Zäcke erforscht. / Bild: zvg
Dr Familiename Burgdorfer gits nume grad im Eggiwiu u ir Seeländer Gmein Vinelz. Hüt fingt me nume no weni Burgdorfer, im Eggiwiu säuber gar kener meh. Mir isch ufgfaue, dass um 1650 ume, wo Eggiwiu isch vo Signou abtrennt worde, rächt viu Burgdorfer dert gwohnt hei. Mehreri Höf ir Luchsmatt hei dere Familie ghört, aber o ir Glashütte u im Hiipu (Heidbühl). Dr Christian Burgdorfer-Haldemann het ab 1715 im Dörfli d Krämerei gha. Ab 1724 isch är dr Inhaber vor Sauzbütti worde. Sauz isch es Monopu gsy vom Staat u wär die Bütti het verwautet, isch öpper gsy. Bi de Toufine vo de Ching vo däm Christian sy vo denn aa gäng Bärner Herre u gnädigi Froue Götti u Gotte gsy. So 1728 d Ehefrou vom Sauzdiräkter u Ratsherr Tillier, d Johanna Katharina Tillier, geboreni Malacrilla. Wo aber dr Sauzherr vo Eggiwiu gstorbe isch, het är ke Bueb gha, wo het chönne wyterfahre u ds Huus u Krämerei isch a d Familie Stettler vo Eggiwiu übergange. Drmit isch d Familie Stettler über Generatione im Eggiwiu wirtschaftlech führend gsy. O ds Amt vom Sigrischt het de Burgdorfer ghört.
E Fritz Burgdorfer het im 1780 ghürate u z Waukringe gwohnt. Die sy de aber niene me richtig daheime gsy, aui Jahr hei si d Ching irgendwo angers la toufe. Die sy wyt umecho: 1803 hei si ihres letsche Töchterli z Christiana (hüt Oslo) z Norwege la toufe. Die Norweger sy aber um 1820 wieder hei cho u hei z Bärn e Guetshof pachtet vomene Gnädige Herr. Dr Suhn het aber e Norwegere ghürate (e Andrina Anders von Aggertshuus).
Äbefaus Heimatort Eggiwiu het dr Profässer Willy Burgdorfer gha. Är isch 1925 z Basu gebore u het dert o Zoologie gstudiert. Är het sech uskennt bsungerbar mit Vire und Parasite. 1951 het är sy Dokterarbeit gschribe über d Läderzäcke. Är isch de uf Amerika usgwanderet u het dert im 1981 usefunge, das Lyme-Borreliose vomene Erreger u de Zäcke usglöst wird. Dür das isch es de müglech worde, die Chrankheit z kuriere. Dr Erreger het drum der Name «borrelia burgdorferi» übercho.
Dr Profässer Burgdorfer isch zwar im 1986 pensioniert worde, är het aber no 15 Jahr ar Uni wytergforscht. Meh weder 200 Fachartikle het är publiziert. 2014 isch er gstorbe.