Dr Arme-Kataschter isch eis vo de früechschte u komplettischte Verzeichnis vo dr Gmein Lützuflüeh. Schynbar het me i de 1770er-Jahr gäng drüber zangget, wär wie viu muess i d Armekasse yzahle. Grundsätzlich hei das nume d Grundbsitzer müesse mache. Einzig ganz am Schluss sy no es paar «Capitaliste» oder «Rentiers» cho, auso meischtens auti Bure, wo dr Hof am Junior hei abträtte u nume no ihres Barvermöge hei verwautet. Die Lüt sy sehr wichtig gsy, wüu vor 1850 ufem Land chuum Banke oder Ersparniskasse hei exischtiert. Die ryche Lüt hei auso wie ne Bank ihres Gäut usglehnt u die Schuldner hei de müsse jährlech ga zinse. I dere Zyt, no vorem Napoleon, isch dr Hypothekarzins so um 4 bis 4½ Prozänt gsy! Näb dene aute Bure hets o no es paar rychi Fröleins gä, wo i viune Fäu die ledige Schwöschtere vo Bure sy gsy, u äbefaus ihres Vermöge so hei aagleit. I weiss no vo dere Zyt här, woni uf Notariat oder Grundbuechämter ha gschaffet, dass es um 1780 es Frölein uf Flühle het gää, wo Gammeter het gheisse. Die het ihres Vermöge so aagleit.
Die Arme-Kataschter sy nach Gebiet gortnet gsy, u dert sy aui Hüser ufgschribe worde, wo dert sy gstange. So hani e Überblick, wie viu Hüser 1784 sy gsy u wäm die ghört hei. Derzue chani aahand vor Schetzig o gseh, wie gross die Hüser sy gsy. D Wärte sy i Bärn-Pfung ytreit worde. Das isch eigentlich chly komisch, wüu dr Kanton Bärn das zwar aus Währig het gha, aber nie sy Münze prägt worde. Weme uf d Schmoker-Lischte geit ga luege, gseht me, dass um 1780 es Bärnpfung öppe 40 Franke hütiger Währig sy. U dr Batze, wome im aute Bärn drmit het zaut, isch öppe e Fünfliber wärt gsy. I ha mir einisch es paar Höf im Waudhuus aagluegt. Das sy die grosse, bedütende Heimet gsy u d Bsitzer hei zu de rychschte Lützuflüer ghört. Dr Bsitzer vo eim Hof isch dennzumale dr Jakob Kipfer gsy. Sis Waudhus-Heimet isch denn uf 106'000 Bärnpfund gschetzt worde: Das wäre hüt öppe 4,2 Millione Franke. De sy Bärtschis näbedranne mit nume 70'000 Bärnpfund scho fasch arm gsy. Dr Hof Waudhus-Neuhus - das isch dert, wo hüt d Dahlie-Usstellig isch - het nume 30'000 Bärnpfund Wärt gha. Näbem Kipfer isch dr Hansueli Wälti im Flüehle dr Zwöithöchscht uf dr Lischte gsy. Si Hof isch mit 100'000 Bärnpfund bewärtet worde. Dr Vater Kipfer im Waudhus het no gläbt im 1784. Dr Hof het zwar am Suhn ghört, aber är isch erwähnt unger «Capitalischte». Är het es Vermöge vo 65'853 Bärn-Krone gha. Das wäre umgrächnet 8,2 Millione Franke hütiger Währig u Wärt!