Dr Jonas Glanzmann, mi Forscher für aues usem Mittuauter, het mer für ds Heimatbuech
vo Lützuflüeh über d
Burgsteue vo Ginschbärg u Jegerlehn gschribe. Är wird o no öppis über Brandis u Münnebärg mache. Über Brandis, wo
1798 abbrönnt isch, heig är viu Materiau gfunge, het mir dr Glanzmann brichtet. Är heig so viu Sache, dass är chönnt
ds Bougsuech für e Wiederufbau vo däm Schloss yreiche. So es Bougsuech isch wou scho lang nümme ufere bärnische
Gmeindsschryberei uftoucht.
D Freiherre vo Brandis, die gits no. Dr aktuell Herr von Brandis wohnt hüt im Schloss
Orlik z Südböhme (Tschechei).
Itz aber zur Burgsteu Ginschberg (Geinisberg). Oberhaub vom Dorf u dr Chiuche isch e Hügu, wo i aute Zyte isch e
Burg gstange. Lang het das gar niemmer meh gwüsst. Ersch 1965 isch erwähnt worde, dass es dert vermuetlech d Räschte
vo dere Burg vo Lützuflüeh heig. Mir wüsse ja, dass ds Chloschter Trueb 1130 vom Thüring vo Lützuflüeh isch gründet
worde. Ir Urkunde isch o erwähnt, dass dä Thüring dennzumale scho viu Land het gha. Drum chöi mir drvo usga, dass
Lützeflüh im Jahr 1130 scho exischtiert
het. Dass dr Thüring vo Lützuflüeh aber uf Ginschberg het gwohnt, chame
nid bewyse.
Dass Lützuflüeh denn scho exischtiert het, bewyst hingäge
d Chiuche. Die hets nämlech scho im Jahr 900 gä.
Vom Standort Ginschbärg het me uf au Fäu e gueti Usssicht gha ache i ds Tau, im Oschte bis gäge Rüederschwiu u im
Weschte bis uf Hasli ache. I dr Zyt vom Mittuauter isch es gäng wie wichtiger worde, dass me Befeschtigunge het
gmacht u Chiuche het boue. Dr gäng grösser Handu u vor auem o d Piuger sy e wichtigi Ynahmequelle gsy. Mir cha drvo
usgaa, dass die Burg Ginschberg isch ufgää worde, wo ds Schloss Brandis isch bout worde. Dennzumale isch das no ohni
Boubewilligung gange!
Die angeri Burgsteu, wo scho fertig gschribe isch, wär d Ruine Schmiedslehn oder Jegerlehnburg im Talgrabe hinger.
Si isch zimli gnau uf dr Gmeinsgränze zu Waukringe. Scho 1864 het
dr Aubert Jahn die Burg i sim Buech beschribe,
d Landlüt heige vomene «Zwingherreschloss» gredt. Dr Jonas Glanzmann schrybt, dass die Burg vermuetlich am Rand vom
Brandiswaud zwüschem Jahr 900 bis 1000 isch bout worde. Me het o use-
gfunge, dass me vo dr Schmiedslehnburg
diräkt bis zum Schloss Brandis het gseh. Me het bir Burgsteu o Sache gfunge: Sporre, Pfiubouze u e Niete vo
Rossgschirr. Die Schmiedslehnburg het aber ender «nume» e regionali Schutz- u Verwautigsfunkion gha.