Weni d Gmein Lützuflüeh erforsche, hani o mit dr Gschicht vo zwone Ysebahne z tüe. Am 9. Septämber 1875 hei die Delegierte vo de Gemeine ds definitive Bouprojekt beschlossse. Me het die genaui Streckefüehrig feschtgleit u o, wo d Statione häre chöme. Projektverfasser isch dr Herr Dietler gsy. Die nöii Ysebahn söu auso vo Burtlef bis i Farbschachen bi Lützuflüeh links vom Ämmeufer bout wärde, u de dert mit ere Brügg über d Ämme uf die rächti Syte ga, bis me de ir Obermatt by Langnou i ds Bahntrassee vor Bärn-Langnou-Bahn chunnt. I däm erschte Bouprogramm isch no nid vonere Wyterfüehrig vo Ramsei uf Huttwil d Reed. Vorgseh isch aber gsy, dass es z Ramsei e Station «Ramsei-Sumiswald» söu gä. Die ganzi Längi isch uf 21 Kilometer cho. Im Jahr 1876 isch de o scho klar gsy, weli Gmein wie viu muess zahle. Lützuflüeh zum Byspiu het 45'000 Franke a dä Bahnbou müesse bytrage. Das Gäut het aber itze o müesse zaut wärde. Burtlef het mit 300'000 Franke dr klar gröscht Bytrag müesse yzahle. U we de das isch erlediget gsy, het me chönne am Bundesrat es Konzässionsgsuech für die Bahnlinie schicke. Im Ougschte 1877 isch i de Zytige gstange, dass Burtlef, Lützuflüeh u Louperswiu die Zahlige heige bschlosse. Es Problem hets z Solothurn gä. D Centralbahn-Gseuschaft het sech gweigeret, es Gleis vom Bahnhof Solothurn us Richtig Burtlef z füehre - me het die nöii Konkuränz nid gschetzt. Wäge däm het me z Solothurn müesse e nöii Versorgig vor Bahn plane u usfüehre. Dr Kanton Bärn het 1875 bschlosse, das me die nöii Bahn mit 800'000 Franke tüeg fördere. Scho im Juli 1876 het me chönne die ganze Ygabe prüefe u die gsamte Bouchöschte sy uf 3,9 Millione cho! Glück het me gha, dass d Ysepryse 1876 wäg dr wirtschaftliche Laag in Europa uf emene töife Level sy gsy. Im Dezämber 1882 isch d Bahn z ersch Mau usgfaue: e Dammdurchbruch by Lützuflüe hat dr Vercheer ungerbroche. Die Bahn het dennzumale rächt guet rändiert. 1892 het d Aktionärsversammlig chönne e Reingwinn vo meh weder 140'000 Franke verteile.