Es urauts Wort, u das grad zwöi Mau

Ds Heimet «Zweiache» ligt ganz am weschtleche Rand vor Gmein Waukringe – u drmit o vom Verteilgebiet vor «Wuche-Zytig». Drzue chunnt: Die Ortsbezeichnig isch sehr exklusiv. Ir ganze Schwyz gits «Zweiache» nume grad dert. Im erschte Momänt hani däicht, dass im Louf vor Zyt am Schluss vo dere Bezeichnig e «r» isch verlore gange, de hätti das nämlech bedütet, dass es dert «zwe Ächer» hät gha. Itz hani aber gseh, dass imene Dokumänt usem Jahr 1377 nüt steit vo zwene Ächer, sondern «ze Zwijachen». De geits hie auso um d Ändig «-ache». Die chunnt vom Authochdütsche «aha», es Wort, wo für Gwässer isch brucht worde. U weme de geit ga luege, wie das Heimet «Zweiache» gläge isch, de isch aues klar: E Bitz links u e Bitz rächts vo däm Heimet gits Bäch, wo entspringe u när gägem Taugrund loufe. D Ändig «-ache», wo äbe «Gwässer» bedütet, fingt me o bimene rächt grosse Bach, dr «Rotache». Dr Bach fat ir Heimenegg ir Gmein Ungerlangen-

egg a, wo drei Bäch zämeloufe: dr «Limpach», ds «Weidbächli» u vo Wachsudorn här ds «Rohr». Dr Zämefluss liegt uf zimli gnau 900 Meter über Meer. När louft d Rotache dür d Gmeinde Fahrni, Buchholterbärg, Oberdiessbach, Bränzikofe, Opplige u louft när z Chiese i d Aare. D Höchi vor Ymündig isch 540 Meter über Meer, d Rotache louft auso nid weniger aus 460 Meter nidsi. Kes Wunger, dass dä Bach im Louf vor Gschicht o scho für schwäri Überschwemmige het gsorget. D Chraft vor Rotache isch aber o gnützt worde, me fingt Belege für Mühline, Saagine u sogar für ne Öli, wo sy aatrybe worde. Näbscht em Bach fingt me o Heimet u Wyler wo «Rotachen» heisse. Unger angerem isch anno 1389 es «guot genempt die Rotacha» erwähnt. O dr Bach toucht natürlech i viune Dokumänt uf, wüu me viu het gschribe, dass es Grundstück bis a d Rotache göng. D Schribwys «Rotachen» fingt me o scho im 14. Jahrhundert. Dr erscht Teu, «Rot-» dütet drufhäre, dass ds Wasser vo däm Bach uffäuig starch rot gfärbt isch gsy. Das wieder dörfti vom starch ysehautige u lättige Bode härcho.