Es einschtigs Mode- label usem Ämmitau?

Gucci, Prada, Louis Vuitton – isch äch aube im «Modeneich» e ganz bekannte Schnyder gsy, wo äxtravaganti Chleider für
d Dame u d Herre het gmacht? Immerhin isch dä Ort bi Schwande scho im 14. Jahr­hundert erwähnt worde. 

Was het me denn so treit? Afe mau chame säge, dass sech d Manne u d Froue rächt ähnlech aagleit hei. Me het je nach Tämperatur e Ungerrock u drüber e Cotte treit, wo warm het gä. E Gurt het de die Sach zämegha. Bi de Mann isch dr Rock öppe bis zu de Chnöi cho u meischtens gschlitz gsy. Das isch gäbiger gsy zum Loufe, wüu d Manne hei ja scho Hose treit. Mit «Hose» sy aber nume Hoseröhre gmeint. Modetrends hets natürlech scho denn gä u vor auem die fürnäme  Fröileins hei sicher nid sone längwilige Rock wöue trage. Vo Burgund us isch de e Mode verbreitet worde, wo d Figur viu meh betont het: ds Mieder. Drzue sy d Usschnitte vo de Dame grösser worde u dr letscht Schrei sy Hube gsy. Ganz beliebt isch offebar dr Hennin gsy. Das isch es zylinderförmegi, verzierti Hube gsy – je grösser, desto uffäuiger. Uffäuig isch o dr Ortsname «Modeneich». Dä gits offebar ir ganze Schwyz nume z Schwande. Die Bezeichnig isch auso exklusiv wienes Gucci-Täschli. U dä Ort toucht würklech scho i Dokumänt usem 14. Jahrhundert uf: «Min guot und eigen, daz da lit ze Mudeneich», isch im Jahr 1341 im Usburgerrodu vor Stadt Bärn notiert worde. Dr Bsitzer vo däm Guet isch auso Bärn-Burger gsy, o das isch ender exklusiv. Me gseht aber scho a dr Schrybwys, dass dä Ort äue nüt mit Mode z tüe het. Dr erscht Teu vo dere Bezeichnig wird über Jahrhunderti mit «Muden» gschribe. Ersch i de Amtsrächnige usem Jahr 1644 chame de dr erscht «o» läse: «in der Monteneych». Die hütegi Schrybwys isch äue de im 19. Jahrhundert ufcho. Was bedütet «Modeneich»? Dr zwöit Teu «eich» chunnt vo Eiche, wos äue dert sy gstange. Dr erscht Teu isch chly schwieriger. I Frag chunnt e Personename «Mudi», wo o aus Über­name fürne Stumme isch brucht worde. Es het o dr Familiename «Muodeneich» gä, wo i dere Gägend nachegwise isch – hüt isch dä aber nümme i Mode.