I mine letschte Byträg hanech vo militärische Yteiligsrödu verzeut. Da isch mir no es Gschichtli i Sinn cho, wo die Lischte würklech sy brucht worde. D Ämmitauer sy zur Gränzbsetzig ir Oschtschwyz ufbotte worde, wo Öschtrych u Bayern i de Jahre 1703 u 1704 gägesitig sy im Chrieg gsy. Zu däm isch es wägem sogenannte Spanische Erbfougechrieg cho. Denn hei d Herrscherhüser Habsburg u Bourbon drum zangget, wär ufem Spanische Thron darf höckle – u regänte. Dr Karl II, e Habsburger, wo uf däm Thron isch gsy, isch chinderlos gstorbe, was für ne Chünig zu dere Zyt zimli e Seich isch gsy. Am Schluss hei de d Bourbon gwunne. Itz aber zrügg id Oschtschwyz, wo äbe d Ämmitauer a d Gränze hei müesse. Wäge däm hei o es paar Trueber einisch dr Bodesee gseh. Die Zyt dert ar Gränze isch e chly längwilig gsy u dr Oswaud Habegger vom Bachschwand het nid nume gärn dr Bodesee aagluegt, sondern o d Anna Maria us Lindou. Vermuetlech isch är nid dr einzig gsy, wo es Oug uf die jungi Frou het gha. Dr Habegger isch sech offebar zimli sicher gsy, dass är de speter vo dere Fründin nüt me wärdi ghöre. Im Jahr 1704 sy de die Ämmitauer wieder hei u dr Oswaud het däicht: vergässe isch vergässe.
Im Apriu 1704 isch d Anna Maria Gräzer us Lindau im Pfarrhus Trub gstange u het wöue wüsse, wo dä Oswaud tüeg wohne. Si heig es Hüratsverspräche vo ihm u syg drzue no schwanger. Dr Oswaud het zu dere Sach nümme viu chönne säge u het die Frou vo änet em Bodesee müesse näh. Är het em Pfarrer no verzeut, dass är se nid hei mitgno, wüu är däicht heig, si heig z Winterthur o no e Schatz.Dr Oswaud het se zwar ghürate, aber scho ne Monet speter isch är bimene Hochzyt yglade gsy u dert heig är mitem Milpach Eisi ume gscharwänzlet. Das het o dr Pfarrer vernoh, wo ihm de e Strafpredig het gha.
Dr Habegger u d Lindouere hei de mindistens vier Ching gha: Im Oktober 1704 hei si dr Wilhelm la toufe. Im 1708 isch z Signou es Vreni drzuecho u i de Jahre 1712 u 1717 hei sy im Trub vo zwöi wyteri Ching am Pfarrer chönne mäude.
Dr Gotthäuf het die Gschicht o gschribe. Är het aber d Lindoure es paar Jahrzähnt euter gmacht, warum weiss i nid.
D Lindouere heig bsungers guet chönne choche. Die angere Froue im Trueb hei se zwar für ne Häx aagluegt, aber d Manne hei die gueti Suppe gschetzt. Si isch sogar einisch bimene Ching vom Pfarrer Gotte gsy. Verzeut wird hüt no, dass sie im Garte heig Schlange züchtet. Si heig de die Schlange, i fini Röhrli gschnitte u i d Suppe taa! Dä Trick – es isch natürlech Schnittlouch gsy – heige d Trueber Froue no nid kennt!