Us de Uszüger-Rödu vom Jahr 1722, woni
chürzlech ha übercho, gseht me nid nume, wär us de Gmeinde Signou, Eggiwiu, Röthebach, Langnou u Schangnou het
müesse yrücke, me gseht o, wie die Sach isch organisiert gsy. Das het ganz ähnlech tönt wie bir hütige
Armee.
D Ämmitauer
Soudate sy i sächs «Corporalschafte» yteilt gsy. I dr erschte Corporalschaft, unger dr Leitig vom Christian
Dällebach, em Schärer, sy houptsächlich Soudate us dr Gmein Signou gsy. Die zwöiti Corporalschaft unger dr Leitig
vom Ueli Haldemann zu Horbe het us Manne us Eggiwiu bestange. Die dritti Corporalschaft isch us de Manne vo
Röthebach biudet worde, d Leitig isch hie bim Christian Schindler in der Spitzache gsy. Die vierti Corporalschaft
ungerem Kommando vom Ueli Gerber uf Langenegg het fasch nume Soudate us Langnou gha, gnau glych wie die föifti
Corporalschaft ungerem Befäu vom Niklous Geissbühler vom Stock. Die sächsti u letschti Corporalschaft isch o die
chlynschti gsy, nämlich die vo Schangnou. Dert het dr Peter Siegethaler ds Säge gha.
«Ohne Mampf,
kein Kampf.» Das Motto het offebar scho 1722 gulte. Uf au Fäu sy zwee Proviantwäge organisiert gsy, eine für Signou,
Eggiwiu u Röthebach, wo dr Ueli Reinhard im Niedermattgrabe het müesse steue. Es isch gnau aagä gsy, wär für was
zueständig isch gsy. So het dr Ueli Stouffer vom Dieboltsbach müesse es Gspann Ross steue, drfür het är de nid i
Dienscht müesse. D Langnouer hei dr zwöit Proviantwage müesse lifere. Für dä isch dr Simon Röthlisbärger zueständig
gsy. Dr Michel Kipfer uf Dürsrüti het de mit däm Wage müesse fahre. Intressant wär natürlech no z wüsse, was die
Soudate gässe hei. Vo däm steit aber äbe nüt i däm Rodu.
O für d Poscht
isch gsorget worde. Dr Postillion uf em Ross isch dr Färber vo Signou, dr Abraham Schlatter, gsy. Dä het de d Briefe
vo de Soudate hei uf Signou brunge, vo dert a hei de d Briefträger vo de Gmeinde d Briefe müesse vertrage u d Poscht
für d Soudate müesse bringe.
Im Rodu isch o
bezeichnet gsy, wär e Uszüger isch gsy. Das sy die Soudate gsy, wo aus erschts hei müesse yrücke. Vo dene Gmeinde sy
das 53 gsy.
So settigi
Lischte sy natürlech o sehr nützlech für d Familieforschig. Chürzlech hani grad d Fankhuser vom Neuenschwand
düregno. Dert chani itze dank däm Rodu säge, dass eine vo de Vorfahre isch dr Schwärtträger gsy. Jedi Einheit het
dennzumale nid nume es Banner gha, sondern o es Regimäntsschwärt. Das Amt gits hüt ir Schwyzer Armee nümme, aber bir
Chrönig vom Chünig Charles vo Ängland het me e Schwärtträgere chönne gseh, wo ihre Dientscht taa het.