Dass dr Familiename «Schlapbach» oder
äbe «Schlabach», wie dä z Amerika gschribe wird, vom Ortsname «Schlapbach» abstammt, isch sicher wie ds Amen i
dr Chiuche. U dass die vom Wiler «Schlapbach» ir Gmein Signou chöme isch äbefaus klar – es git die
Ortsbezeichnig süsch niene ir ganze Schwiz. D Frag isch itze, wenn dass de die letschte Schlapbachs dert gläbt
hei.
Im Heimatbuech
vo Signou sy aui Schlapbach-Höf ytreit. Kene ghört hüt amene Schlapbach.
We me chly zrüggluegt, de fingt zwüsche
1750 u 1880 mänge Wächsu u däm entsprächend viu Bsitzer: Wiedmer, Steiner, Röthlisberger, Kipfer, Stauffer,
Rothenbühler, Fankhauser, Rupp, Mosimann, Beutler, Feuz, Schwarz, Reber, Künzi, Haldemann, Ryser, Zürcher, Lüthi –
dir gseht, o dert wird me nid fündig. Weme no chly wyter zrügg geit, de isch es eso, dass es um 1635 dert offebar
ersch eis Heimet het gä u das het o nid amene Schlapbach ghört, sondern amene Salzmann.
Fündig wird me
ersch im Signouer Urbar, wo isch ufgschribe worde, wär wie viu Zähnte het müesse zahle. Um ds Jahr 1530 isch e
«Andres zuo Schlappach» ufgschribe worde! Das chönnt itz auso e ächte
«Schlappach» sy.
D Schribwys mit
«pp»fingt me no hüt ganz säute.
Dr Ortsname isch
im Louf vor Zyt zimli ungerschidlech gschribe worde. Die erschti Erwähnig stammt usem Udelbuech (1389 bis 1460),
dert steit «Schlatbach». Dass genau dä Ort gmeint isch, bewyst dr Zuesatz «Kilchhöre Signow». Nächär
wächslet d Schribwys geng meh vo «Schlatt» zu «Schlapp». Die hütegi Variante «Schlapbach» toucht im 17. Jahrhundert
zerschmau uf.
Zu däm Wächsu
isch es cho, wüu «Schlatt» nümme gebrüchlech isch gsy. Me fingt das Wort hüt nume no i Ortsnäme. «Schlatt»
bezeichnet e Hangkante binere Äbeni. «Schlapbach» isch auso dr Bach unger dere Äbeni. Dert isch öppe, we dr Schnee
gschmouze isch, chly Wasser ache gloffe. Das erklärt o, warum dass es dert süsch gar ke Bach het.
Dr Familiename
Schlapbach oder Schlappach isch ender rar. Autbeleit isch är i de Gmeinde Oberlangenegg, Stäffisburg, Linde u Bäup.