Error compiling Razor Template (contact the administrator for more details)

Weni Vorrät hei viu Beärdigunge brunge

Weni Vorrät hei viu Beärdigunge brunge
Gfüeti Eier passe natürlech o guet zur Oschtere. / Bild: zvg

Chürzlech hani e Vortrag über «Ässe u Treiche im Ämmitau» gha. Während em Vortrag hets gäng wieder e Pouse gä, wo mir hei chönne es Gricht usprobiere. Dr Wirt u siner Lüt ir Chuchi hei d Chochzyte wunderbar im Griff gha u es het beschtens funktioniert. Mi Vortrag isch nach dr Euti vom Gricht gange, mir hei auso im Mittuauter ­aagfange mitere Suppe.

E Missärnt het Hunger bedütet u drnah o viu meh Beärdigunge. 

I ha einisch d Todesfäu vo Grosshöchstette berächnet us de Jahr 1731 bis 1739. Tatsächlich sy denn i de Monate Jäner u Horner je 23 Prozänt vo aune Beärdigunge gsy, auso genau denn wo d Vorrät gmingeret hei. We me de no dr März mit 12 Prozänt vo aune Beärdigunge yrächnet, so sy i däm Viertujahr dütlech  meh weder d Heufti vo aune Beärdigunge gsy. Wär auso dr März überläbt het, dä het füre Räschte vom Jahr chönne ufschnufe.

Bsungers wichtig isch es auso gsy, im Früehlig zu Chrefte z cho. Wär sech het uskennt mit de Chrüttli het im Früehlig aber scho öppe die erschte Süppli chönne mache. Us mehrere Handschrifte us Chlöschter us dr hütige Schwyz isch es Rezäpt für so ne Suppe überlieferet. Die «Neun-Stärke-Suppe» het me so churz vor der Oschterzyt gmacht us ere Gmüessuppe, wo me us de Räschte vom Gmües vom Vorjahr het zämekochet. Drna isch me im Garte u im Waud ga sueche, was me fingt. Wichtig: Es müesse exakt nüün Chrüttli sy. Im Mittuauter het die Zau gäng no e mageschi Bedütig ghaa. Im Dütsche gits gäng no es Sprichwort «Ach, du grüne Neune!». I die Suppe chame auso aui Früeh­ligschrüttli tue, zum Byspiu Scharbockschrut, Brönnnessle, Söiblueme, Spitzwägerech, Gundermann, Giersch u Rams (Bärlouch). Suurampfer u Chirbele het me o im Mittuauter scho kennt. Die Suppe het me auso gmacht us dr Gmüessuppe u de früsche Chrüttli u het de no Sauz – u we me no het gha – o no chly Anke drita!

Scho bereits zur Römerzyt isch d Hüehnerhautig beliebt worde. Eier sy wichtig gsy u me het die o brucht. Bereits zur Römerzyt si die o hüt no beliebte gfüete Eier gässe worde. Me het d Eier gchochet, gschintet u haubiert. Ds Gäube nimmt me use und tuet de e Masse us Öu, Anke, Chrütter, Sänf mit eme Sprützsack wieder i ds Loch vom Ei yfüue.

06.04.2023 :: Hans Minder