Die eutischti Voukszählig vo Eggiwiu isch die vo 1764. Denn het dr Pfarrer 1709 «Schäfli» zeut. 1850 sys de scho 2843 Ywohner gsy u 1888 isch Eggiwiu mit 3215 Ywohner am gröschte gsy. Hüt (2020) wohne no 2424 Lüt ir Gmein Eggiwiu.
We mir scho vo de Ywohner rede: Im Eggiwiu hets 1887 o no 85 Hüng gä, wo je föif Franken Stüüre müesse zahle (oder dr Bsitzer). U im Jahr 1877 het Eggiwiu sis Vermöge erfasst: me isch uf guet föif Millione Franke cho. Das wäre hüt öppe so 60 Millione. D Stüürynahme aber sy nume 16´711 Franken gsy (hüt öppe 200´000).
1898 sy aui Läde mit Läbensmittu u aui Beckerei kontrolliert worde: 35 Beckereie u Lädeli hets im Eggiwiu gha! Nume scho ufem Siehe obe sy zwe Läde, ei Beck u ei Wirtschaft gsy. Uf Neuenschwand het dr Christian Wüthrich e Lade gha. Dert het dr Inspäkter reklamiert, dass är Pfäffer u Safran im Aagebot heig, wo scho so aut syg u das dä ke Chuscht me heig. Am Heiri Wyss uf der Hindte het är grad aue Kafi gno; es het dert Sache drinn gha, wo mit Kafi nüt z
tüe heig gha. Dumm isch es am Hiipu-Wirt gange: Ihm het dr Inspäkter dr Kirsch u dr Träsch mitgnoo. Es isch nämlech uscho, das da nume 34½ Prozänt Aukohou drinn isch gsy – dä het sy Schnaps äue chly gstreckt.
Im Jahr 1927 sy aui «Firme» im Eggiwiu vom Statistische Amt erfasst worde. 89 Persone hei bir Stüürerklärig aus säubständig gulte. Die Lischte isch natürlech üsserscht intressant. Vier Beckereie hets no gä: Bigler Johann, Haldemann-Bühler in Horbe, Stettler Emiu im Dorf u Stettler Gebrüder im Öli. Gasthöf sy gsy: dr Bäre, dr Löie (Zesigers, dennzumale die beschti Frässbeiz im Ämmitau), d Aeschoupinte, Liechtis uf em Hirschi im Hiipuu u Tschanes uf em Siehe. Wyter steit uf dere Lischte no ei Gärnterei, e Düngemittufabrikant (Leuenberger in Gärbi), ei Murermeischter (Gebrüder Brächbühl), ei Metzgerei (im Hiipu), ei Notar (dr Fritz Siegethaler) u schliesslech o nume ei Hebamme (d Frou Zougg ir Houzmatt). Sagereie hets viere gä (Hiltbrunner, Lehmann, Stettler u Wüthrich). Mir finge aber o Lädeli, Chäsereie (siebe verschiedeni!), Küefer, drei Mühline, zwe Sattler, vier Schmiede (eine drvor isch dr Simon Zougg gsy, dr Gründer vor Zougg AG). Uswau hets für d Chunde o bi de Schnyder gä (sächs) u de föif Schuemacher. Föif Firme sy im Vehhandu tätig gsy u zwo ir Zimmerei.
Im 1888 hets e Boumzählig gä. Im Eggiwiu hets 12´000 Öpfuböim gha u de no 14 Spalier-Öpfuböim. Drzu chöme 3200 Bireböim, 6000 Chirschiböim u 1400 Zwätschge- u Pflumeböim. 63 Nussböim sy o zeut worde. Chüttene hets kee einzige gä. Das tüechti mi nid schlimm, i cha mit dene Chüttene nid viu aafaa.