Dert, wo dr Muni uf d Weid het chönne

Mir säge ja amene männleche Rind hüt meischtens «Muni». Das schwyzerdütsche Wort isch aber jünger aus ds Wort «Stier». Ir authochdütsche Sprach hets das scho gä: «stior.»

Ortsnäme mit Stier sy im Ämmitau u Äntlibuech rächt hüüfig.
Ei Grund drfür isch, dass no bis nach dr Mitti vom 20. Jahrhundert sy a viune Orte d Munine für d Zucht vo Gnosseschafte oder angere Gmeinschafte ghaute worde. Dr Bur, wo zu däm Muni het gluegt, het de e bestimmti Flächi dörfe bruche, wüu dä Zuchtstier ja o het müesse gfueret wärde.

So erstuunts nid, dass me im Gebiet vor Wuche-Zytig grad mehreri «Stierematte» fingt: Z Bowiu, z Oberdiessbach, z Rütene bi Zäziwiu oder o ds «Stieremetteli» ir Gmein Grosshöchstette. Das isch scho imene Dokumänt usem Jahr 1664 erwähnt.

Äbefaus autbeleit isch dr «Stierebärg» im Heimisbach, Gmein Trachsuwaud. «ab Jrem Stierenberg vnnd der Khu^eweÿd» steit imene Urbar vo 1573. Im Bärou gits wyter dr «Stierebode».

Grad es paar Mau fingt me dr Ort, wo die Munine hei chönne ga grase. I de Landschryberprotokou isch e Ytrag z finge usem Jahr 1639: «kaspar bort man last wirdigen sin halbe weid, die stieren weid...». Dir gseht auso, dass füre Stier e äxtra Weid isch gmacht worde. Luschtig fingeni aber o, wie dr Nachname vo däm Kaspar isch gschribe worde: Hüt würd me nümme «bort man» sondern «Portmann»schribe. Die Stiereweid z Wigge isch früecher e Aupliegeschaft gsy, wo offebar Stiere sy gsümmeret worde. Dr Ortsname isch übrigens o uf ds Gwässer übergange, wo dert «Stiereweidgrabe» heisst.

E Stiereweid isch wyter o i Luterbach überliferet (im Gebiet vor Gmein Lützuflüeh). Z Oberburg isch d «stier weid» erwähnt u zwar im Urbar vor Insel (em hütige Spitau z Bärn) usem Jahr 1534. O im Oberthau, gnau gno ir Neechi vom Hargarte hets e Stiereweid gä u när o no z Frymettige. Dert isch o klar wo: Zwüsche de Heimet Stockere u Hammerried. Bi au dene Ortsnäme dörftis würklech Munine ha gä. Chly angersch ligt dr Fau äue bim «Stieregrind» z Waukringe. Dert dörfti dr Name entstange sy, wüu dä Hoger e chly usgseht wie dr Gring vomene Stier.