Error compiling Razor Template (contact the administrator for more details)

Die Ortsnäme sy eifach Spitze

Die Ortsnäme sy eifach Spitze
D Spitzenegg macht ihrem Name aui Ehr. / Bild: Bruno Zürcher (zue)

Ortsnäme mit «Spitz» dinne, fingt me no ganz hüüfig. Zum Byspiu bi Näme vo Bärge. Das isch ja o bim höchschte Bärg vor Schwyz eso: «Dufourspitz». Hie umenang hani vo auem ei spitze Bärg gfunge u dä heisst de o grad «Spitzenberg». Ganz obe uf däm Spitz hets de es chlyses äbens Bödeli u dert isch aube e Burg gstange. «Aube» meint hie im Mittuauter. Bis 1240 isch die Burg ir Gohl dr Stammsitz vo de Freiherre vo Spitzebärg gsy. Die Burg het de bestange bis nach dr Schlacht vo Sämpach vo 1386. Dr Wolfhart IV. von Brandis, wo i dere Schlacht de Bärner het ghuwfe, het die Burg de zerstört.

Zrügg zum Ortsname: Spitzebärg isch natürlech zu sim Name cho, wüu ds Gländ uf aune Syte ganz stotzig isch. Hüt isch die Burgsteu bewaudet. Das isch dennzumale no nid eso gsy u d Bewohner vor Burg hei d Gägner guet chönne gseh, we si dür das Bord ueche kragslet sy – bis äbe de der Wolfhart mit sine Manne isch cho. 

Dass i dere Gägend d Topografie ganz spitzig isch, zeigt sech da dranne, dass ir Neechi drü Heimet sy, wo «Spitzenegg» heisse. Die sy scho imene Dokumänt usem Jahr 1371 erwähnt u d Schrybwys isch denn scho so gsy, wie hüt. 

Luschtig tönt no «Spitzehus». Das isch e Ort im Brandösch ir Gmein Trueb. D Decher vo dene Hüser sy aber nid spitziger aus die vo angerne. D Bezeichnig chunnt hie vom Spitz, wo ds Gländ grad obedranne macht – es sy aus d Hüser bim Spitz. 

Hüüfig meint «Spitz» o e drüeggige Bitz Land, zum Byspiu e Acher, wo i ne Spitz louft. Ds Signou gits – wie i ganz viune Gmeinde im Mittuland – e «Spitzacher». Z Louperschwiu heisst es Mätteli inere Cheri «Spitzmätteli» u im Schangnou gits es Heimet, wo inere drüeggige Matte inne isch u wäge däm «Spitzmatt» heisst. Sogar Gwässer chöi spitzig sy.
Z Oberdiessbach u im Trueb louft es «Spitzgrebli». U ir Gmein Sumiswaud, chly nördlech vo vorder Arni gits ds «Spitzgrotgrebli». 

Ganz, ganz spitz isch offebar dr Grat, wo me weschtlech vom Dorf Rötebach isch. Dä Grat isch so spitz wie dr Spitz vonere Eichte u heisst wäge däm o grad «Eichtespitz». 

18.08.2022 :: Bruno Zürcher (zue)