D Ueli-Fiume vom Franz Schnyder wäre ohni Eggiwiu nume e haubi Sach. Klar, d Glungge isch i de Wynigebärge u weme ine Chiuche het müesse, isch nume Würzbrunne i Frag cho! Während dere Fiumerei hei dr Franz Schnyder u siner Lüt im Bäre Eggiwiu glogiert. Im Fium Ueli dr Pächter gits ja die berühmti Szene mit dr Wirti, wo chunnt cho Wy bringe, i däm Momänt, wo d Glungge-Büüri dr Ueli mit em Vreneli wot verkupple. D Wirti isch vom Bäre im Eggiwiu gsy – ds Sääli aber isch im Löie z Heimiswiu.
Vor Jahre het mir einisch dr Löie-Wirt gseit, dass är no nid lang uf em Löie syg gsy, wo die Fiumerei syg losgange. Em Franz Schnyder syg si Frou z mager u z jung gsy. Wäge däm heig de dr Schnyder d Bäremueter vo Eggiwiu la choo.
Die Gschicht het mir o a Maa bestätiget, wo aus Bueb ds Eggiwiu guet kennt het. Är het mir brichtet, dass är denn anere Grebt im Löie Heimiswiu syg gsy, wo uf einisch d Bäremueter syg uftocht. Die heig si Mueter guet kennt u gseit, dass si da müess cho fiume. Jakobli, dr Bueb, het när hinger em Kameramaa chönne zueluege wie die berühmti Szene isch gmacht worde.
Viu Ufnahme heig me uf ere Aup obe gmacht. Dr Buur Zougg, wo denn dert isch gsy, heig am Schouspiler Schmid-huser müesse lehre z bure.
Es git no Fotone, wo dr Hannes Schmidhuser mit eme Bärg-pflueg hantiert.
Mis aktuelle Lieblingsfoto isch aber das, wo dr Ueli es Chäubli tuet strychele. Das Chäubli isch uf dr Aup im Ysatz gsy u dert gfiumet worde. Es chunnt
aber vor Leimere z Eggwiu, vo Aeschbachers.
Das Chäubli isch auso usgleiht worde, u de ume zrügg cho. Im Fium heisst das Chäubli «Blüemli» – Aeschbachers heiges drnaa umtouft uf «Fiumstar»!