Dr Familiename Schüpbach gits o nume im Ämmitau. Hüt kennt me dä no i de Heimatorte Arni, Bigle, Bleike, Grosshöchstette, Hasle, Landiswiu, Mirchu, Oberthau, Schlosswiu, Signou u Zäziwiu.
Es isch zimli sicher, dass dä Name vom Ort Schüpbach ir Gmein Signou chunnt. Scho im Jahr 1250 wird das Schüpbach aus «curtis», auso «Hof», inere Urkunde erwähnt. E Ort, wo Schüpbach heisst, fingt me o i de Gmeinde Eggiwiu, Röthebach, Bowiu u im Biembach. Im «Ört u Näme» het me chönne läse, dass das vomene Bach chömm, wo normalerwys nid viu Wasser füehri, aber uf einisch – wes wyter obe het gewitteret – de regurächt schütti.
1353 isch wyter e «Wernherr Schüppach» inere Urkunde erwähnt. 1408 het dr Amme vo Oberdiessbach «Uolli Schupachs» gheisse. 1650 isch de o der «Hans Schüpbach» vor Habchegg bi Arni erwähnt. Vo ihm weiss me nid viu – aber vom Grosssuhn Micheli de scho meh, wie Dir wyter unger chöit läse.
Zersch no zum Ueli Schüpbach vo Bigle: Dä het im Burechrieg aus Houptme mitgmacht u isch nachhär vo de Gnädige Herre ungändig enteignet u aus ehrlos bestraft worde.
1654 isch e Jakob Schüpbach ir Region Burtlef aus Töiferlehrer umezoge. Dr Landvogt vom Schloss Burtlef het ne imene Brief aus «ein schändlicher Wolf» bezeichnet.
1707 isch uf Habchegg z Arni dr berüemtischt Schüpbach gebore, dr «Schärer Micheli» oder Michael Schüppach. Är het nie e Universität vo inne gseh, sondern e Schärer-Lehr gmacht. Är isch aber e guete Mönsche- u Chrütterkenner gsy. Die gstudierte Dökter z Bärn hei d Nase grümpft u probiert ihn ychezlege. Wie denn üeblech het är dr Harn vo de Patiänte aagluegt. Wo ihm öpper Rossbisu het zeigt, het är es tüürs Bündeli Höi aus Medizin verchouft. Item, jedefaus het dr Micheli Schüppach bis a sis Läbesänd im Jahr 1781 aus Dokter z Langnou gwärchet u sogar dr Johann Wolfgang vo Goethe isch einisch bi ihm gsy. Die gstudierte Herre Dökter hei 1747 gemerkt, dass dä Maa meh cha weder angeri u hei ne zum «Kunsterfahrenen Medicinae et Chirurgiae Practico» diplomiert. Das Bündeli Höi het gwürkt!
Öppis Eigeartigs sy d Schüpbach vo Grosshöchstette, Oberthu u Zäziwiu. Das sy nämlech vor der Ufteilig vo de Chiuch-
gmeinde u de Ywohnergmeinde aues Bürger vo Grosshöchstette gsy. Ersch mit dr Ufteilig 1832 hets Schüpbach vo Oberthu u vo Zäziwiu gää. Effektiv hets im Oberthu gäng Schüpbach gha, aber in Zäziwiu hani kener gfunge. Die Schüpbachs, wo denn sy Zäziwiler Bürger worde, hei z Hasli gwohnt. Me het schynbar aui Bürger, wo usswärts hei gewohnt, uf die nöie Ywohnergmeinde verteilt.