Error compiling Razor Template (contact the administrator for more details)

D Stäffe chöme usem Luzärnische

Es fröit mi gäng ume, we öpper fragt nach sim Familiename. I gibe gärn Antwort, wen i cha. Logischerwys symer d Ämmi-tauer Näme necher, weder öppe die wäutsche. Aber was «Jaquet» heisst, weiss i o. Grad o für d Bruefsbezeichnige oder d Ämter gits fasch gäng für ne dütsche Name o e Familiename uf Französisch. We eine uf hiesig Zimmermaa heisst, sött dä uf Französisch Charpentier heisse. Komisch, das fingt me aber nid im Verzeichnis. Dert isch äbe ds Problem! Im Wäutsche het me im Mittuauer nid Französisch gredt, sondern e Dialäkt. Me seit däm hüt Frankoprovenzalisch. 

Itz chumm i zrügg uf die Aafrag: Es geit um d Familie Stäffe (Steffen). Dä Name gits im Ämmitau z Dürreroth, z Lützuflüeh, im Trueb u z Affoutere. Viu hüfiger isch är im Kanton Luzärn. Dr Name isch im Luzärnische o viu euter. Es chönnt sech bi dene Stäffe um Luzärner handle, wo ir Reformationszyt i ds refomierte Bärn sy usgwanderet.  

E Hans Stäffe isch nachem Burechrieg 1653 gstraft worde. Es isch ds erscht Mau, dass dä Name im Ämmitau überhoupt vorchunnt. 1715 het dr Ueli Stäffe us Affoutere amene Töifer ghuwfe u isch drum bestraft worde. Dr Aubärt Stäffe isch Chäser gsy u isch uf Russland usgwanderet, ir Revolution isch är de id Mongolei gflüchtet u het de dert käset. Am Schluss han i aber o no dr Fritz Stäffe z Lützuflüe im Oug, e begnadete Künschtler. 

Dr Name chunnt vom Vorname Stephan oder Stephanus. Dr heilig Stephanus isch nach em Nöie Testamänt dr erscht Märtyrer vom Christetum gsy. Är syg vom Gricht verurteilt u gsteiniget worde. 

I ga drvo us, dass d Ämmitauer Stäffe us Affoutere chöme. Dert sy si z ersch erwähnt. Sicher isch o, dass d Stäffe vo Lützuflüeh vo Affoutere uf e Hof Büeu sy cho. Dä Hof, hüt ir Gmein Rüegsou, het früecher zu Lützuflüeh ghört. Vom erschte Johann Stäffe vom Büeu (so um 1600) stamme aui Lützuflüeher Stäffe ab. Die vo Dürreroth han i o zimlech zäme, dert sy über Generatione Stäffes Gmeinsschryber gsy, aber o e guete Schütteler (Willi Steffen) isch vo Dürreroth gsy! D Trueber Stäffe sy ersch um 1650 zerscht Mau i de Büecher vo Trueb z finge, wo die härchöme, han i no nid usefunge. 

24.03.2022 :: Hans Minder