Ds Süesshüsli liegt zwüsche dr Bäregg u Truebschache. / Bild: Bruno Zürcher (zue)
A Orte, wo im Name «Süess» drinne hei, isch es sicher schön oder es git viu Süesses z ässe. Es isch äue beides richtig, woby ds Zwöite vor auem für ds Veh dörfti gäute. Settig Orte sy nämlech eso benamset worde, wüu dert Süessgräser bsungers guet wachse. Dr Bode isch auso nid nass u suur. Imene Gebiet wie ds Ämmitau u ds Äntlibuech, wos im Verglych zum Räschte vor Schwyz viu rägnet us viu moosige Bode het, sy süessi Matte zimli rar – i ha grad nume zwe gfunge: Ds «Süesshüsli» ir Gmein Truebschache isch weme vo Bärou här chunnt ygangs vom Dorf uf dr lingge Syte. När gits no ir Gmein Sumiswaud d «Süessegg». Das isch e Aahöchi im Hingerarni, wo dr höchscht Punkt immerhin uf 1238 Meter über Meer ligt.
Süessgräser sy e ganzi Familie vo Pflanze. Unger angerem ghöre Getreidearte wie Weize oder Rogge drzue aber äbe o Fuetterpflanze für ds Veh wie ds Knoulgras oder dr Wiesenschwingel.
Aber äbe, es git o suuri Böde, wo dr Ertrag mager isch. Viu vo dene sy i de letschte 150 Jahr drainiert, auso entwässeret worde. Es faut aber uf, dass viu Ortsnäme mit «suur» sehr aut beleit sy. «Surgraben» ir Gmein Lützuflüeh isch scho im Trachsuwauder Urbar vo 1569 erwähnt oder «Surmettle» ir Gmein Eggiwiu i de Amtsrächnige vo 1627 – d Schrybwys isch übrigens scho denn eso gsy wie hüt. O im Trueb isch nid aues süess gsy: «Inn Suren Bodenn» isch im Trueber Urbar vo 1531 gschribe worde. Hüt heisst dä Ort «Surenbodenhüttli». Bi au dene Gebiet, woni itz ufzeut ha, dörfti dr Bode ender suur sy oder aube sy gsy. U we de es ganzes Heimet zimli suur isch gsy, de isch dert de ds Läbe äbe o ender suur gsy. Ortsnäme mit «suur» drinne chöi auso o Gebiet meine, wo d Bewirtschaftig nid eso süess isch.
Dr Ort «Sürisguet», zimli hinger im Häntschegrabe ir Gmein Trachsuwaud, isch hie e Usnahm. Afe einisch dörfti das scho vor Topografie här nid eso nass sy – es isch nämlech ganz obedruffe – u när düte o die historische Belege ine angeri Richtig.Das isch nämlech ds Guet vom Süri. Wie das die Person am Ursprung genau het gheisse isch nid klar. I Queue usem 15. u 16. Jahrhundert list me «Thomi von Suris guot» aber o «Schueri» oder «zuris».