Ds Jahr 1831 isch nid erfröilich gsy füre Pfarrer Jakob Friedrich Brugger vo Schangnou – ömu vom Wätter här.
Bi dr Pfrundaup uf Trittschwändi het e Blitz ygschlage u het ir ungere Trittschwändi im Stau grad acht Chüe töt. Erstuunlech isch drby, dass dr Stau nid verbrönnt isch. Dr Blitz isch überne Bauke dür d Bühni ache i Stau u het dert die Chüe erschlage. Dr Puur het e Schade gha vo 567 Chrone, schrybt dr Brugger wyter. Dr Oberamtmaa vo Langnou heig drvo 100 Chrone gspändet.
Im Ougschte 1831 hets no grösseri Schäde gä im Bärnerbiet, nämlech grossi Überschwemmige im Oberland, bsungerbar im Haslitau. Im Schangnou hets o überschwemmt, vor auem im Buembach, im Schacheweidli u im Bödeli. Bis ache i ds Tau sy aui Brügge u Stääge furt gsy. Bim Guet vom Ueli Schlüechter im Tau isch guet d Heufti vom Land furtgschwemmt worde. O dr Peter Augsburger im Schachebüeu het guet d Heufti vom Land a d Ämme verlore.
Scho am 3. Septämber 1831 hets afa schneie. D Öpfu sy no a de Böim ghanget u wägem Schnee sy de viu Escht abbroche. O dr Rogge, dr Haber u o no Ämd sy ygschneit worde.
Die nöii Orgele het am 6. März 1831 zersch Mau gspiut. Füre Nöibou vom Schueuhuus het me am Zimmermaa Wittwer uf em Bärg dr Uftrag chönne gää. Ds Murwärch het dr Johann Egli übernoh. Ds aute Huus het dr Johann Bieri vo dr Schyneflue kouft u abbout. U när het dr Pfarrer i sire Chronik u no e Unfaumäudig müesse ytrage: Im Mei isch dr Peter Bieri vom ungere Scheidbach bim Flösse ir Räblochschlucht verunglückt.
Wyter schrybt dr Pfarrer o no, dass d Härdöpfu im März sehr tüür syge gsy.
Ds Russland isch im Jahr 1831 d Cholera es grosses Problem gsy. Mit dä Unruehe wos o z Berlin u z Wien heit gää, het sech die Chrankheit o gäge Weschte verbreitet. D Regierig z Bärn heig aus gmacht, dass die Süüch nid o hie viu Opfer verursachi. Me heig uf Woufebärg sogar es Quartier vorbereitet, wo me de die Chranke cha isoliere.
Obschon die Süüch bis am Schluss bis uf Spanie u Portugau isch cho, het me im Kanton Bärn Glück gha u es isch nid viu passiert. Dr Pfarrer Brugger schrybt i dr Chronik, dass me vo Bärn dr Befäu heig übercho, dass me Kamille söu aaboue u angeri gsungi Chrüter.