Im Jahr 1830 sygs im Winter rächt chaut gsy, het dr Pfarrer Brugger vo Schangnou i sire Chronik ufgschribe. Drfür syg ds Wätter speter im Jahr guet gsy, wo d Öpfuböim heige blüejt.
Ussergwöhnlich syg de dr Septämber gsy, es heig nämlech düre ganz Monet Näbu gha. O d Grippe syg i däm Jahr es Problem gsy im Schangnou. O dr Pfarrer hets verwütscht gha u wär bau dranne gstorbe.
E wichtegi Frag im Jahr 1830 isch Planig vom nöie Schueuhus gsy. Schynbar hei siner Rät nid gäng e so wöue, wie dr Herr Pfarrer. D Gmeinrät sy dr Meinig gsy, dr Herr Landvogt (auso dr Oberamtmann z Langnou) tüeg de scho luege. Dr Pfarrer het das mit emene ironische «allon enfans de la patrie» quittiert. Sie hei sech zum Byspiu nid chönne einige, ob es würklich für Meitli u Buebe zwöi verschiedeni Schisshüsli bruchi.
Im Jahr 1830 het me o im Pfarrhuus e nöie Brunne gmacht. Drzue het me im Stössli verschiedeni chlyneri Quelle zämegleit u de zum Pfarrhus abgleitet. Das Wasser isch de aber nid nume für ds Pfarrhus gsy. Dr Pfarrer het das Wasser mit dr Wirtschaft Löie u am Chrämerhuus müesse teile.
O dr Vertrag mit em Pächter, wo ds Land vom Pfarrer het bewirtschaftet, isch nöi ufgsetzt worde. Sehr detailliert het dr Pfarrer au die Pünkt ufgfüert, wo dr Pächter unbedingt muess beachte. I däm Vertrag isch o erwähnt, dass im Ofehus e Wohnig söu ybout wärde, wüu dr Pächter ir nächschte Zyt im Schmittliguet use müess.
Am Nöijahr 1830 hets im Löie e grüslegi Schlegerei gää. Im Apriu syg bim Flösse dr Niklaus Wahlen umcho. Är syg bir Klus vom Tritthububach im Eriz unger ds Houz cho u gstorbe.
Sogar vor Revolution z Paris schribt dr Schangnouer Pfarrer öppis i sis Buech. Vo dert us sygs de i ganz Europa zu Ufstäng cho. Dr Pfarrer Brugger schrybt o vo Uster im Züribiet. Dert heig ds Vouk d Regierig abgesetzt. Aber o d Burdlefer erwähnt er, wo gäge d Herrschaft vo de Gnädige Herre schrybi. Er het de prediget, dass me die auti Regierig, äbe die Gnädige Herre, scho wäg dr Bibu müess ungerstütze: Är het im Schangnou vom Erschte Korintherbrief, 9 bis 13, prediget. Die Gnädige Herre hei sich scho no gewehrt gäge d Absetzig, es isch de aber es Jahr speter, im 1831, fertig gsy – o we dr Pfarrer vo Schangnou lieber wär bir aute Ordnig blibe.
De isch o wieder einisch dr Löie nöi verpachtet worde. Zu dere Zyt het die Wirtschaft i ds Armeguet ghört u so isch au sächs Jahr d Pacht wieder nöi versteigeret worde. Dr nöi Pächter isch dr Hans Schlüechter worde, dr Suhn vom Chorrichter ir Lindematt. Der Pfarrer hofft, das dr nöi Wirt ume Ordnig i die Sach bringt. Dr vorder Wirt heigs nid im Griff gha.