Dr Johann Bieri uf em Bärg het im Jahr 1828 für Schangnou 600 Krone gspändet. Är syg aus Verdingching ufgwachse uf Chöschte vor Gmein Schangnou; aber är heig dörfe es Handwärch lehre. Schlussändlech syg är aus Chäshändler rych worde u är heig kener Nachkomme.
D Gemeinsvätter heige das Gäut wöue i d Armekasse tue, schrybt dr Pfarrer Brugger i sire Chronik. Dr Pfarrer het ne das de usgredt. Das Gäut syg ir Schueu nötiger.
Zum Schluss het dr Pfarrer no notiert, dass me im Dezämber 1828 mit em Bou vom nöie Huus vom Chrischte Gärber-Wäuti – heig aagfange. Das Huus chöm chly oberhaub vom Dorf Waud cho z stah. Es heisst no hüt «Wäutihuus».
Über ds Jahr 1829 schrybt dr Pfarrer, dass es ganz gruusig chaut im Winter syg gsy. Si Thermometer heig är nümm chönne abläse. Dr Pfarrer z Marbach heig 20 Grad minus gha, im Schangnou sygs no ordeli cheuter gsy. Einisch im Summer syg ds Wätter uf einisch besser, ja sogar heiss gsy – aber nach es paar Tage isch es grüsligs Uwätter cho. Z Marbach heig dr Blitz i Chiuchsturm gschlage, grad wo syg glütet worde. Dr Heum von Turm syg knickt worde, aber zum Glück niemmer verletzt. Ersch Ändi Septämber heig me de no chönne ds Ämd ytue. Es syg vorhär drei Wuche uf em Fäud blibe u usgrächnet am Bätttag syg dr einzig schön Tag gsy u me heig müesse das Ämd ytue, Sunndig hin oder här. I de nächschte Tage heig ds Wätter komplett dumm ta. Es heig ei Tag grüselig chaut taa u em nächschte Tag syg wider e Hitzewäue cho. Die eutischte Schangnouer heige ihm gseit, dass so öppis no nie syg vorchoo. Vom 17. bis am 22. Novämber sygs de chaut gsy, drfür de am 25. Novämber wieder warm.
Ufe Früehlig isch si Studiekolleg Ruedi Hess zum Pfarrvikar vo Truebschache gewäut worde, was ne het gfröit. Är schrybt de aber ou vom grosse Füür ir Gmein Schüpfe im Äntlibuech, wo fasch ds ganze Dorf isch verbrönnt. Es heig ire Beckerei aagfange, d Bise heig das Füür aablase u i churzer Zyt syg fasch ds ganze Dorf abbrönnt. Mit Müeh heig me chönne d Chiuche, d Kaplanei u eis Wirtshuus rette. Im 1829 het me de o bschlosse, dass me ir Chiuche vo Schangnou wot e Orgele aaschaffe. Ir Reformation het me d Orgele usegno, wüu die Musig nid chrischtlech, syg. Dr Chiuchmeier Wüthrich u dr Hans Schlüechter, dr Suhn vom Chorrichter, heige zäme es Tischörgeli kouft u hei de o grad güebt für dr Gmein vorzspile. D Gmein het das o so bschlosse u me het vo Tür zu Tür Gäut für die Orgele yzoge. Bieris vo Zwöisimme hei aus usswärtigi Burger vo Schangnou grad mit em gröschte Poschte aagfange. D Orgele het me z Louperschwiu bim Chammermaa bsteut.