Error compiling Razor Template (contact the administrator for more details)

Ds erschte Bschüttloch het dr Pfarrer gha

Ds erschte Bschüttloch het dr Pfarrer gha
Am Pfarrer Brugger sy Beijstöck gstohle worde. / Bild: zvg

Dr Pfarrer Brugger het 1826 ufgschribe, dass ihm es paar Mau syge Beijstöck gstohle worde. Zu dere Zyt het me für d Beij Chörb us Struh gmacht. Är het wägem Stäle bim Pfarrhuus z Schangnou es Gsteu la mache. Bi dere Glägeheit heig är dr Söistu zur Schüür übere la verlege. Mängisch sygs drum vorcho, dass ne ganzi Raglete Söi vor em Pfarrhuusygang heig «angegrunzt». O vomene Bschüttloch isch d Red, dr Pfarrer schrybt aber «Mischtwassersammler». D Boukommission vo Bärn het das u o no grad e Füürweiher zaut – das heigs denn z Schangnou o no nid gä!

Dr Pfarrer het wyter uf Bärn gmäudet, dass ds Brönnhouz knapp wärdi. Är het de dr Uftrag übercho, z luege, ob es Waud z choufe gäb. Es hätt im Büeuwaud öppis gha, aber dert syge so viu Schulde druff gsy, dass Bärn nid heig wöue. So heig är nume «Mühe, Gänge und Schreiben» gha, aber kes Schittli meh. 

D Gmeinsvätter heige klagt, dass är statt ir Chiuche lieber im Schueuhuus tüeg predige. Är heig ne de aber d Levite gläse, wie d Schangnouer schlächti Predigbsuecher syge. 

Im Buembach-Schueuhuus hets denn zimli Räbu gää. Dr Lehrer Erb isch wäge «unsittlichem Betragen» aaklagt worde. Es heige de Züge uf Langnou müesse wäge dere Sach – u d Schangnouer syge ihre Lehrer losworde. Dr Oberamtmaa het de verlangt, dass dr nöi Lehrer pro Jahr sibe Chrone meh söu übercho. D Schangnouer hei nid wöue. Das het sech dr Oberamtmaa vo Langnou nid la biete u befole, dass däm Maa dr Lohn aazpasse syg u fertig! Itz sött me no e Lehrer ha, wo uf Buembach wott. Dr Ersatzlehrer Siegenthaler vor Stägmatt heig nie o nume e chlyni Aahnig vor Schueu gha u rächne chönn dä de gar nüt, het dr Brugger notiert. Dr Peter Dubach, wo sech de het gmäudet, isch zwar z
Truebschache entlaa worde, aber är syg glych besser.

Zum Schluss schrybt dr Pfarrer no, dass är im Summer 1826 si Frou heig lehre kenne, d Caroline Isabella Christine Lutz us Aublige. Är heig scho es paar Mau uf das Aublige müesse loufe «auf Freiersfüssen». Wo är de mit sire Brut syg heicho, heige se d Bursche «mit vielen Schüssen» begrüesst. Är würd aber amene zuekünftige Pfarrer rate, scho mit ere Frou uf Schangnou ´zieh, es syg  ufwändig, weme im Amt no e Frou «suchen und verühren» müess! 

28.10.2021 :: Hans Minder