Error compiling Razor Template (contact the administrator for more details)

Dert, wos sammlet – aber was?

Dert, wos sammlet – aber was?
Im Gebiet Sammlige hets viu Wasser – o am Wägwyser. / Bild: Bruno Zürcher (zue)

Churz u bündig «Sammlige» heisst e Ort ganz obe ufem Hilferepass. Es isch im Gebiet vor «Wuche-Zytig» die einzegi Steu mit dere Bezeichnig, u an sich o die einzegi, wo uf ds Verb «sammle» zrügg geit. Zerschmau erwähnt isch «Samblichen» im Verzeichnis vo de kassierte Gülte usem Jahr 1658. Nume 16 Jahr speter toucht scho fasch die hütegi Schrybwys «Samlige» uf. 

Das Weideland u dr Waud wird hüt vo dr Korporation Marbach bewirtschaftet. Was heisst hüt? Das isch  sit 1794 eso, wie d Ortsnameforschere Erika Waser usegfunge het. Ursprünglech het dä Bsitz zum Hochwaud ghört. Da drmit isch nid Waud gmeint, wo höch obe isch. Nei, das isch Waud gsy, wo de Höche ghört het, auso dr Obrigkeit. 

1596 isch de dr Hochwaud ufteilt worde. Die erwähnte Güeter sy zum Amt Äschlismatt cho, wo o Marbach umfasst het (sit 2013 sy die beide Gmeinde fusioniert – wie sech Gschicht mängisch wiederhout). 1794 isch das Hochwaud-Gebiet zwüsche Äschlismatt u Marbach ufteut worde; «Sammlige» isch a Marbach gange. Luschtigerwys ghört das Land hüt zur Gmein Flüehli.

Was aber isch dert gsammlet worde? Guet müglech wär
eigentlech: Veh im Herbscht. Vor Topografie här würd sech das Gebiet eigne für d Tier zäme-
ztrybe, bevor dass es gägem Tau zue geit. Dir merket aber, i schrybe zimli viu ir Müglechkeitsform. Ender i Frag chunnt nämlech, dass das Gebiet wägem vile Wasser, wo sech dert sammlet, zu sim Name isch cho. Es het dert ganz mänge chlynere u grössere Bach, wo sech när zum Hilferebach sammle. 

Ds schwyzerdütsche Wort «Samlig» – wo dr Ursprung vo «Sammlige» isch – meint augemein «Sammlung» oder «Vereinigung». Brucht worde isch das o ds Rüegsou: «des sammunges und klosters von Ruexouwe» steit imene Dokumänt usem Jahr 1372. Versammlet hei sech dert d Chloschterfroue. 

Bim «Sammattweidli» im Eggiwiu u bim «Samstuacher» bi Oberburg, bini nid sicher, öb das o öppis mit «sammle» z tüe het.
I tippe ender uf ne Name.
«Samuel» oder «Salmi» chöme i Frag.  Luschtig isch no, dass beid Ört (Weid u Acher) hüt bewaudet sy. Zimli sicher zu «Samuel» ghört «Samirot» z Dürrerot u «Sämelerhole» z Langnou.   

07.10.2021 :: Bruno Zürcher (zue)