Dr Pfarrer Brugger het säuber wöue bure

Dr Pfarrer Jakob Friedrich Brugger isch 1825 aus nöi gstudierte Pfarrer diräkt uf Schangnou cho. Är het inere chlyne Chronik ufgschribe, was ne wichtig het düecht. Är het das  meh oder weniger ohni Plan gmacht. Es isch auso e chly es Dürenang. 

Luege mir, was dr Pfarrer im Jahr 1825 wichtig het düecht: Ds Pfarrhuus u d Chiuche hei gäng öppe Arbit gä. Das het dr Pfarrer säuber müesse organisiere. Dr Christian Hofer vo Langnou isch uf Schangnou ueche cho, für aui Schlösser nöi z mache. Dr Pfarrer schrybt no, dass dä Hofer e Töifer syg, aber haut glych e guete Schlosser u im Schangnou heig das kene chönne. Dr Schangnouer Schryner Chrischte Wöufli het drfür e nöij Tür gmacht u ds Sääli gstriche. Dr Murer Hans Egli het im Garte vom Pfarrhus e Muur u e Stäge gmacht u e nöie Bode ir Chuchi. Drnah het dr Pfarrer vo sine Nachbarspfärrer afe schrybe. Är het aui Pfarrwächsle
ygschribe.  Dr Pfarrer vo Eggiwiu syg im Amt gstorbe, schrybt är, dr Pfarrer vo Röthebach, dr Herr Louener, syg drfür uf Eggiwiu gschickt worde un e Usswärtige, e Pfarrer Schärer us Wädenswiu, syg de uf Röthenbach i ds Würzbrunnechiuchli ga predige. 

Dr Brugger schrybt o no über ds Wätter. Es heig weni Höi u Ämd gä. Dr Peter Stettler het dennzumale ds Pfarrland i Läche gha. Dä het o mit Chauber ghandlet u dr Pfarrer schrybt, dass är mehreri Wuche lang, ds Gmöög vo de Chauber u ds Bäue v de Hüng heig müesse ushaute. U de chömm dä Stettler no cho jammere, är wöui weniger Zeis zale!   

Uf e 23. Merze 1825 het me müesse ds Veh zeue. Im Schangnou hets denn sibe Munine, 296 Chüe, 234 Guschti u Chauber, 27 Ross, 15 Fühli u no 475 Schaf u 385 Geisse gä. Drzue sy no 108 Söi zeut worde. Dr Pfarrer het sech de überleit, ob är säuber söu bure u däm Stettler künnte. Dr Pächter heig die füregi Miuch gäng verchäset u wenn är Gescht heig gha, heig är nid emau Anke u Miuch chönne
ufsteue! Die Sach isch de i ds Loufe cho, wüu är e tüechtige Chnächt u e gueti Magd heig übercho. De isch am Stettler sofort kündet worde. Ds Wätter syg miud gsy im Herbscht. No am 4. Chrischtmonet sygs ufem Grüenebärg obe grüen gsy.
Dr Pfarrer schrybt no, dass ds schöne Wätter bis am
28. Dezämber syg blibe.