Hie sy viu Dubach touft worde: Ir Chiuche z Rougemont. / Bild: zvg
Dubach isch e Familiename, wos i de Gmeinde Eggiwiu, Lützuflüeh, Sumiswaud, Trachsuwaud u Trueb git. Aber dä Name chunnt o im Äntlibuech, im Gürbitau, im Schwarzeburgische, im Oberland u im Urnerland vor. D Urner säge de aber «Dubacher».
Dä Name chunnt ursprünglech us em Wäutsche, gnau gno meischtens us Rougemont oder Rötschmund, wie me im aute Bärn däm Ort het gseit. Dert gits dä Name gäng no, heisst aber «Dubath». Wie d Bieri (eigentlich «Pierri») oder d Gottier (in Rougemont hüt no aus «Cottier» gschribe) chöme o die Dubachs vo dert, wüu die Lüt hei gwüsst, wie me voufette Chäs macht. Üser Vorfahre hei nume Ziger, Mager- u Surchäs gkennt. Die Lüt us em Greyerzerland
(Rougemont het zur Grafschaft Greyerz ghört) wärde i de erschte Büecher öppe no aus «Wäuschchäsers» bezeichnet.
Es het aber o Dubachs gä, wo gwirtet hei. Ir Tanne z Trachsuwaud isch um 1630 e Dubach Wirt gsy. 1643 het der Land-
seckumeischter vom Ämmitau am Hans Dubach ganzi 403 Pfund für nes Feschtässe müesse zale. Das isch viu Gäut gsy, weme däicht, dass e Chue öppe 40 Pfund het gkoschtet. Am 24. März 1653 het dä Hans Dubach o d Landsgmein vo de Bure vom Ämmitau gha, wo drus use dr Burechrieg isch worde.
Dubachs sy bis 1864 Eigetümer vor Tanne blibe, we o mängisch e Lächemaa gwirtet het. Dr Wirt ir Tanne het übrigens nie dörfe Rindszunge uftische – är het aui Rindszunge em Landvogt uf ds Schloss müesse bringe!
D Trueber Dubachs sy Wirte im Löie gsy. D Gmeinde Trueb u Schangnou hei i de 1680er-Jahr wäge dene Dubachs zanget.
D Trueber hei zwar anerchennt, dass dr Vater Dubach, wo mit sire Frou u sine Ching im Schangnou gwohnt isch, im
Trueb syg ufgwachse. Dä würde Trueber aus ire Bürger anerchenne, aber d Ching wöu me de nid. Dr Landvogt het das o nid wöue ha u so sy Dubachs no gäng Bürger vo Trueb u nid vo Schangnou.
Bi de Dubach vo Lützuflüeh isch mir dr Chlous Dubach ufgfaue: Dä het zersch de Bure ghuwfe chriege u nachem Chrieg dr Obrigkeit die gsuechte Bure
z verhafte. So heig är mit angerne zäme dr Niklous Löiebärger gfange u de drfür vo Bärn e siubrige Pokau übercho, dä Judas!